आउँदो शैक्षिक सत्रदेखि कक्षा ५, ८ र १० का लागि नयाँ पाठ्यक्रम

काठमाडौं । नयाँ शैक्षिक सत्रदेखि कक्षा ५, ८ र १० मा नयाँ पाठ्यक्रमअनुसार पठनपाठन हुने भएको छ । शैक्षिक सत्र २०८० सालदेखि ती कक्षामा पाठ्यक्रम अनुसार पठनपाठन गराउने गरी पाठ्यक्रम विकास केन्द्रले नयाँ पाठ्यक्रम तयार पारिरहेको जनाएको छ ।

पाठ्यक्रम विकास केन्द्रका महानिर्देशक बैकुण्ठप्रसाद अर्यालका अनुसार तीनवटा कक्षाका नयाँ पाठ्यपुस्तक तयार भइरहेको जानकारी दिएका छन् ।

नयाँ पाठ्यपुस्तकको प्रिन्ट रेडी कपी (पीआरसी) तयार भएपछि जनक शिक्षा सामग्री केन्द्रलाई छाप्न दिइने जनाइएको छ ।

कक्षा ५ र १० का अनिवार्य विषयको नयाँ पाठ्यक्रम अनुसारको पीआरसी तयार भइसकेको छ भने कक्षा ८ का लागि तयारी भइरहेको जनाइएको छ ।

कक्षा ५ को पीआरसी जनक शिक्षालाई पठाइएसकेको महानिर्देशक अर्यालले बताए । योसँगै विद्यालय शिक्षाका सबै कक्षामा नयाँ पाठ्यक्रम अनुसारको पाठ्यपुस्तक लागू हुनेछन् ।

सरकारले २०८० सम्म विद्यालय तहका सबै कक्षामा नयाँ पाठ्यक्रम लागू गर्ने योजना बनाएपछि हरेक शैक्षिक सत्रका विभिन्न कक्षामा नयाँ पाठ्यक्रम लागू गरिंदै आएको छ ।

आउँदो वर्ष २०८० सालमा माध्यमिक शिक्षा परीक्षा (एसईई) दिने विद्यार्थीले नयाँ पाठ्यक्रमको आधारमा दिनुपर्नेछ । चालू शैक्षिक सत्र २०७९ को परीक्षा नै पुरानो पाठ्यक्रम अनुसारको अन्तिम हुनेछ ।

१० को अंग्रेजी, नेपाली, गणित, विज्ञान र सामाजिक विषयको पाठ्यपुस्तक तयार भइरहेका छन् । त्यसैगरी कक्षा ५ को अंग्रेजी, विज्ञान, सामाजिक, नेपाली, गणित र स्वास्थ्य तथा शारीरिक गरी ६ वटा विषयको पाठ्यक्रम पनि तयार भइसकेका छन् ।

विश्वव्यापी मान्यताअनुसार हरेक ५ वर्षमा नयाँ पाठ्क्रम लागू गर्नुपर्छ । सोही आधारमा सरकारले नयाँ पाठ्यक्रम लागू गर्न लागेको हो ।

यसअघि २०७६ सालमा पाठ्यक्रम परिवर्तन भएको थियो ।

शैक्षिक वर्ष २०७८ मा कक्षा २, ३, ५ र १२ तथा २०७९ मा कक्षा ४, ७ र ९ मा नयाँ पाठ्यक्रम लागू भएका छन् ।