गाउँवासीको सुखदुःखको साथी बनिरहनेछु : रेखा

विराटनगर । मोरङ क्षेत्र नम्बर ३ मा पहिलेका प्रतिस्पर्धी नेपाली कांग्रेस र नेकपा (एमाले) का उम्मेदवार चर्चामा रहेकामा यसपटक नयाँ अनुहारको प्रवेशले बेग्लै माहौल बनाएको थियो । निर्वाचनमा नयाँ अनुहार भए पनि राप्रपाका तर्फबाट उम्मेदवार बनेकी अभिनेत्री रेखा थापा दर्शकका लागि नयाँ होइनन् ।

उनले निर्वाचनमा निकै मेहेनत गरिन् । फरक शैलीको प्रचार अभियानले धेरैको ध्यान तानेको थियो । तर पहिलोपटक चुनावी मैदानमा होमिएकी रेखाले सफलता भने पाइनन् । पराजित भए पनि उनी उत्तिकै चर्चामा छिन् ।

उनी १२ वर्ष अघिदेखि राजनीतिक क्षेत्रसँग प्रत्यक्ष सम्बद्ध भएकी हुन् । के भन्छिन् त पराजित भएपछि रेखा ?

उनले आफू निर्वाचन लडेको क्षेत्रबाट विजयी बनेका नेपाली कांग्रेसका सुनील शर्मालाई बधाई दिएकी छन् ।

मोरङ ३ का मतदातालाई सम्बोधन गर्दै अभिनेत्रीले सामाजिक सञ्जालमा आफ्नो धारणा सार्वजनिक गरेकी हुन् ।

उनले लेखेकी छन्, ‘यसपटक निर्वाचन जितेर तपाईँहरुका आवाज संसदमा राख्ने अवसर नपाए पनि तपाईँका समस्याका आवाजलाई थप सशक्त बनाउने मान्छेका रुपमा अब तपाईँले मलाई पाउनुहुनेछ, हाम्रो सहकार्य र हातेमालो पनि कायमै रहनेछ ।’ उनले सबै मतदातालाई धन्यवाद पनि दिएकी छन् ।

यसपालिको चुनावमा कलाकार रेखा, कोमल वली, मनोज पण्डित, रोज राणा, हिमेश पन्त, सीते बा भनेर चिनिने मधुसुदन पाठक र सञ्जय श्रेष्ठ प्रतिनिधि र प्रदेश सभा सदस्यमा उम्मेदवार बनेका थिए ।

उम्मेदवार बनेकामध्ये कलाकार तथा निर्देशक राणा कांग्रेसबाट प्युठान प्रदेशसभा ‘ख’ मा विजयी भए भने अरु ६ जना पराजित भएका छन् ।