विराटनगर । पूर्व–पश्चिम राजमार्गअन्तर्गत मोरङको पथरीशनिश्चरे नगरपालिका–२ जयचोकमा मोटरसाइकल दुर्घटना हुँदा शनिबार बिहान चालकको मृत्यु भएको छ ।
प्रदेश १–०२–०४० प ७७७५ नम्बरको मोटरसाइकल आफैँ अनियन्त्रित भएर दुर्घटना हुँदा चालक मिक्लाजुङ गाउँपालिका–७ का २५ वर्षीय मनिहाङ लिम्बूको मृत्यु भएको प्रहरीले जनाएको छ । दुर्घटनामा परेर गम्भीर घाइते भएका उनलाई प्रहरीले उद्धार गरेर उपचारका लागि उर्लाबारीको मंगलबारेस्थित मदन भण्डारी ट्रमा सेन्टरमा लगेको थियो ।
मोरङ ट्राफिक प्रमुख प्रहरी निरीक्षक राजकुमार कार्कीका अनुसार लिम्बूको उपचारका क्रममा बिहान ६ः३० बजेतिर मृत्यु भएको हो । घटनाको अनुसन्धान भइरहेको प्रहरीले जनाएको छ ।
