तेह्रथुमबाट प्रतिनिधिसभा सदस्यमा कांग्रेसकी गुरुङ

तेह्रथुम । नेपाली कांग्रेसकी नेतृ सीता गुरुङ प्रतिनिधिसभा सदस्यमा निर्वाचित भएकी छन् । नेकपा (एमाले) का विजय सुब्बालाई १ हजार ७९ मतले पछि पार्दै उनी विजयी बनेकी हुन् ।

गुरुङले १९ हजार ७ सय २ मत पाएकी छन् । सुब्बाले १८ हजार ६ सय २३ मत प्राप्त गरेको निर्वाचन कार्यालयले जनाएको छ ।

२०७४ को निर्वाचनमा हालका स्वास्थ्यमन्त्री भवानीप्रसाद खापुङसँग २ हजार २१ मतले पराजित गुरुङले यसपटक बाजी मारेकी हुन् ।

यसअघि दुई पटकसम्म प्रत्यक्ष चुनाव जितेका र एक पटक समानुपातिक सूचीबाट सांसद बनेका एमाले केन्द्रीय निर्वाचन आयोगका अध्यक्ष सुब्बा तेस्रो पटक चुनाव जितेर संसद् छिर्ने प्रयासमा असफल बने ।

प्रधानमन्त्री तथा सभापति शेरबहादुर देउवानिकट कांग्रेस केन्द्रीय सदस्य गुरुङ ०६४ र ०७० को संविधानसभा निर्वाचनपछि समानुपातिक सदस्य थिइन् । भौतिक पूर्वाधार तथा यातायात राज्यमन्त्री पनि बनेकी थिइन् ।