बूढीगंगामा विष्फोटपछि रोकिएको मतदान सुरु

विराटनगर । मतदान केन्द्रभित्रै विष्फोट भएपछि रोकिएको मोरङको एउटा मतदान केन्द्रको मतदान पुनः सुचारु भएको छ ।

बूढीगंगा गाउँपालिका–१ स्थित करैया देवीस्थान केन्द्रको मतदान सुरु भएको हो । लाइनमा बसेर मतदाताले मतदान गरिरहेका बेला केन्द्रभित्रै बिहान ९ः४० बजेतिर विष्फोटको ठूलो आवाज आएको थियो ।

प्रमुख जिल्ला अधिकारी काशीराज दाहालका अनुसार १२ः१५ बजेतिर मतदान सुरु भएको हो । विष्फोटको आवाजसँगै मतदाताबीच भगदौड मच्चिएको थियो । बम विष्फोट गराइएको भनेर त्रसित हुँदै मतदाता भागेपछि मतदान स्थगित गरिए पनि पटका पड्काएको पाइएको प्रजिअ दाहालले बताए ।

सबै मतदान केन्द्रको सुरक्षा व्यवस्था कडा पारिएका कारण ढुक्कसँग मतदानमा सहभागी हुन प्रजिअ दाहालले सबैमा आग्रह गरेका छन् ।