निर्वाचनमा उत्साहपूर्वक सहभागिता जनाउन राष्ट्रपति भण्डारीको आह्वान

काठमाडाैं । राष्ट्रपति विद्यादेवी भण्डारीले भोलि (मंसिर ४) हुने प्रतिनिधि र प्रदेशसभा निर्वाचनमा उत्साहपूर्वक सहभागिता जनाउन देशवासीलाई आह्वान गरेकी छिन् ।

शनिबार (आज) एक सन्देश जारी गर्दै मतदान गर्नु नागरिक अधिकारको उच्चतम् अभ्यास भएकाले उत्साहपूर्वक सहभागिता जनाउन उनले अनुराेध गरेकी हुन् ।

राष्ट्रपति भण्डारीले आवधिक निर्वाचनले जनतामा निहित सार्वभौमसत्तालाई औपचारिक रूपले अभिव्यक्त गर्दै राज्यशक्तिको वास्तविक स्रोत जनतामा रहेको यथार्थलाई व्यवहारमा प्रतिबिम्बित गर्ने बताएकी छिन् ।

निर्वाचनलाइ स्वतन्त्र, निष्पक्ष र भयरहित वातावरणमा कायम गरि सफल बनाउन भण्डारीले निर्वाचन आयाेग, सुरक्षा निकाय, राष्ट्रसेवक तथा सम्बद्ध सबैमा सधन्यवाद आव्हान गरेकी छिन् ।