आचारसंहिता उल्लंघन गर्ने मतदान अधिकृतसहित १७ जना हटाइए

विराटनगर । संखुवासभामा निर्वाचन आचारसंहिता उल्लङ्घन गर्ने मतदान अधिकृतसहित १७ जनालाई कारबाही गरिएको छ । कारबाहीमा पर्नेहरुको नाम सार्वजनिक गरिएको छैन ।

आचारसंहिता उल्लङ्घन गर्ने मतदान अधिकृत ६ जना र सहायक कर्मचारीहरु ११ जना गरी कूल १७ जनालाई कारबाही गरिएको जिल्ला निर्वाचन आचारसंहिता अनुगमन समितिका संयोजक चिरञ्जिवी अधिकारीले बताए ।

आचारसंहिता उल्लङ्घन गर्नेहरुलाई जिम्मेवारीबाट हटाइएको अधिकारीले जानकारी दिए ।

कारबाहीमा पर्ने मतदान अधिकृतहरु सबै शिक्षकहरु हुन् । सहायक कर्मचारीहरुमध्ये पनि १० जना शिक्षक र एकजना निजामती कर्मचारी रहेको जनाइएको छ ।

कुनै पनि पार्टीका उम्मेदवारको सामाजिक सञ्जालमा शेयर गरिएका पोष्टरमा लाइक, शेयर र कमेन्ट गर्न नपाउने नियम छ । तर कतिपयले त्यस्तो काम गरेको भन्दै प्रमाणसहित लिखित उजुरी आएपछि उनीहरुले हटाएको आचारसंहिता समितिले जनाएको छ ।