झापा । यात्रुवहाक बसको ठक्करबाट झापाको कन्काई नगरपालिका–७ दुर्गापुरमा मंगलबार दिउँसो पति–पत्नी (श्रीमान श्रीमती)को मृत्यु भएको छ ।
पूर्व–पश्चिम लोकमार्गमा पूर्वबाट पश्चिमतर्फ जाँदै गरेको को १ ख ६७९४ नम्बरको बसले विपरीत दिशाबाट आउँदै गरेको मे ७ प ५०९२ नम्बरको मोटरसाइकललाई ठक्कर दिँदा दिउँसो ३ः५० बजेतिर दुर्घटना भएको हो । दुर्घटनामा परेर मोटरसाइकल चालक अर्जुनधारा नगरपालिका–६ का ५२ वर्षीय नरेन्द्र मैनाली र पछाडि सवार नरेन्द्रकी पत्नी ५० वर्षीया सीतादेवी मैनालीको मृत्यु भएको प्रहरीले जनाएको छ ।
बसले मोटरसाइकललाई ठक्कर दिँदा घाइते भएका उनीहरुको उपचारका क्रममा बिर्तामोडको बी एन्ड सी अस्पतालमा मृत्यु भएको झापा प्रहरीका प्रवक्ता डीएसपी वसन्त पाठकले जानकारी दिए । बस र चालक मोरङको सुन्दरहरैँचा नगरपालिका–६ का ४० वर्षीय भूपाल देवानलाई नियन्त्रणमा लिएर प्रहरीले घटनाको अनुसन्धान सुरु गरेको छ ।
बसले मोटरसाइकललाई ओभरटेक गर्ने क्रममा दुर्घटना भएको प्रारम्भिक अनुसन्धाननबाट खुलेको छ ।
