नियमित स्वास्थ्य परीक्षण गरे गम्भीर रोगबाट बच्न सकिने

गगन नुनिया

विराटनगर । नियमित स्वास्थ्य परीक्षण गर्ने, स्वास्थ्य सरसफाइमा ध्यान दिने, स्वस्थकर खानेकुरा खानेजस्ता बानी गरे क्यान्सरलगायत गम्भीर रोगबाट बच्न सकिने चिकित्सकहरुले बताएका छन् ।

राउन्ड टेबलले विराटनगरमा प्रोस्टेट तथा अण्डकोषको क्यान्सरबारे जनचेतनाका लागि आयोजना गरेको छलफलमा सहभागी उनीहरुले नियमित स्वास्थ्य परीक्षण गराउन सुझाव दिएका छन् ।

अध्यक्ष सुमीत गोयलको नेतृत्वमा रहेको संस्थाले जनचेतनामूलक कार्यक्रम गर्दै आएको छ । कार्यक्रममा आँखा, दाँत र मूत्र प्रणालीका वरिष्ठ चिकित्सकले धारणा राखेका थिए ।

अध्यक्ष गोयलका अनुसार १८ देखि ४० वर्षका युवालगायत सबैमा नोभेम्बर महिनाभर क्यान्सरविरुद्ध जनचेतनामूलक कार्यक्रम आयोजना गरिने भएको छ ।

विराट मेडिकल कलेज एण्ड टिचिङ हस्पिटलका डा. जुबिन सिलवालका अनुसार सामान्यतया ६० वर्षभन्दा बढी उमेरकाहरु प्रोस्टेट क्यान्सर हुन सक्छ । त्यसभन्दा कम उमेरकालाई पनि उक्त रोग हुन सक्ने उनले बताए ।

यो रोगका लक्ष्णहरु पिसाब गर्दा दुख्ने, रगत आउने, पोल्ने तथा मोटोपन भएमा समस्या हुने यो समस्या वंशानुगत पनि हुन सक्ने जनाइएको छ ।

युवाहरुमा अण्डकोषको क्यान्सर हुने खतरा रहने चिकित्सकले बताएका छन् । जन्मिएको शिशु दुई वर्षसम्म अण्डकोष थैलीमा नझुण्डिएको अवस्थामा, अण्डकोष भारी भएको अवस्थामा, पानी जमेको अवस्थामा परीक्षण गर्नुपर्ने बताइएको छ ।

यस रोगबाट बच्नका लागि नियमित परीक्षण, फास्ट फुड नखाने, चिल्लो खानेकुराहरु धेरै प्रयोग नगर्ने गर्नुपर्ने जनाइएको छ ।

सूर्ति र मदिरा सेवन गर्दा पनि ती समस्या हुन सक्ने चिकित्सकको भनाइ छ ।

नारायण मेमोरियल क्लिनिकका उपाध्यक्ष डा. अभिषेक कुमारले मुखको क्यान्सर हुने कारणहरुमा ध्यान दिइ सावधानी अपनाउनुपर्ने बताए ।

सूर्ति खाने, दाँत राम्ररी सफा नगर्ने, सन्तुलित आहार नखाने जस्ता सामान्य आनीबानीले क्यान्स रोग निम्तन सक्ने जनाइएको छ ।

दाँत फोहोर हुँदा गिजा सुन्निने र त्यस्तो बेला ख्याल नगरे समस्या बढ्ने चिकित्सकले बताएका छन् ।

विराट आँखा अस्पतालका डा. ललित अग्रवालका अनुसार विराटनगरमा ओपीडीमा आउने सयजना बिरामीमध्ये आँखाका बिरामी ५० जना हुने गरेका छन् । तीमध्ये ५ जना मधुमेहका बिरामी हुन्छन् ।

डा. अग्रबालले मधुमेहका बिरामीलाई पैताला, मुटु, रगत नली, मृगौला, आँखा जस्ता अंगबारे चेतनशील भई होसियारी अपनाउनुपर्ने बताए ।

मधुमेहका बिरामीले आफ्नो वजन, नियमित रगतको चापमा ध्यान दिनुपर्ने सुझाव दिइएको छ ।

(प्रशिक्षार्थी)