गठबन्धन दल र एमाले कार्यकर्ताबीच झडप

काठमाडौं । निर्वाचनको मिति नजिक आइरहेका बेला चुनावी झडपका घटना सार्वजनिक हुन थालेका छन् । दार्चुलाको नौगाड गाउँपालिका–६ धुलीगाडामा सत्ता गठबन्धनका कार्यकर्ता तथा नेकपा (एमाले) का कार्यकर्ताबीच झडप भएको छ।

झडपमा परी सत्ता गठबन्धनका एक कार्यकर्ता गम्भीर घाइते भएका छन् । नेकपा माओवादी केन्द्रका जयभानसिंह धामी घाइते भएको प्रहरीले जनाएको छ । उनी माओवादी केन्द्र काठमाडौँ–दार्चुला सम्पर्क समन्वय समितिका अध्यक्ष हुन् ।

जिल्ला प्रहरी कार्यालय दार्चुलाका सूचना अधिकारी राजेश शाहीका अनुसार ३५ वर्षीय धामीको प्राथमिक स्वास्थ्य केन्द गोकुलेश्वरमा उपचार हुन नसकेपछि थप उपचारका लागि कैलालीको धनगढी लगिएको छ।

यसअघि गत साता सत्ता गठबन्धन र एमाले कार्यकर्ताबीच अपिहिमाल गाउँँपालिकामा झडप भएको थियो।

घटनापछि उक्त क्षेत्रमा थप सुरक्षाकर्मी परिचालन गरिएको सूचना अधिकारी शाहीले बताए। सो क्षत्रमा नेपाल प्रहरीका साथै सशस्त्र प्रहरीसमेत परिचालन गरिएको छ।