विराटनगर । उद्योग प्रतिष्ठानहरुभित्र हुन सक्ने हिंसा र दुर्व्यवहारलाई निरुत्साहित गर्न पहल थालिएको हो । यसका लागि औद्योगिक क्षेत्रका ठूला उद्योग प्रतिष्ठान, व्यवसायिक फर्म र रोजगारदाता एवं स्वरोजगार व्यवसायका सञ्चालक र कर्मचारीको सहभागितामा कार्यशाला गोष्ठी आयोजना गरिएको छ ।
अन्तर्राष्ट्रिय श्रम संंगठन (आइएलओ) नेपालको आर्थिक सहयोग एवं नेपाल उद्योग वाणिज्य महासंघ काठमाडौंसँगको सहकार्यमा नेपाल उद्योग वाणिज्य महासंघ प्रदेश १ ले कार्यशाला आयोजना गरेको हो ।
शुक्रबार विराटनगरमा आयोजित कार्यशालामा कार्यस्थलमा हुने हिंसा तथा यौनजन्य दुर्व्यवहारविरुद्ध उद्योग प्रतिष्ठानहरुले पालना गर्नुपर्ने आचारसंहिताबारेमा जानकारी गराइएको थियो ।
त्यस अवसरमा महासंघका केन्द्रीय सदस्य डा. अविनाश बोहराले कार्यस्थलमा हुने हिंसाका घटना रोक्नका लागि त्यस्ता घटनामा हुनसक्ने सहनशीलतालाई शून्यमा लैजानुपर्ने बताए । उद्योगभित्र हुने हिंसा एवं यौनजन्य दुर्व्यवहारको परिणाम कर्मचारी तथा श्रमिकहरुमा हुने श्रम मनस्थिति नै बिग्रिएर जानेतर्फ सचेत रहनुपर्ने सुझाव उनले दिए ।
महासंघका सहायक निर्देशक हरि पौडेलले आइएलओ महासन्धि र लैंगिक हिंसा निवारण ऐन बमोजिम हिंसा तथा दुर्व्यवहार विरुद्धको कानुनी व्यवस्था र सजाय हुने अवस्थाबारे जानकारी गराएका थिए । शारीरिक, गैरमौखिक र मौखिक रुपमा हुनसक्ने हिंसाले काममा पुर्याउने प्रतिकुल वातावरणविरुद्ध सवै क्षेत्रबाट भूमिका निर्वाह गर्नुपर्ने उनले बताए ।
कार्यक्रमका सहभागीले आफू कार्यरत उद्योग व्यवसाय, कम्पनी तथा फर्मभित्र हुनसक्ने हिंसाका विरुद्ध कार्ययोजना बनाएर त्यसको पालना गर्नसमेत प्रतिवद्धता जनाएको महासंघ प्रदेश नम्बर १ का कार्यकारी निर्देशक राधारमण भण्डारी (श्याम) ले जानकारी दिए । गोष्ठीमा ४५ जना सहभागी थिए ।
