विराटनगर । प्रदेश १ सरकारका वन तथा वातावरण मन्त्री एवं मोरङ क्षेत्र नम्बर ३ ‘क’ बाट नेपाली कांग्रेसका प्रदेशसभा उम्मेदवार शेखरचन्द्र थापाको निधनपछि उक्त क्षेत्रमा निर्वाचनको नयाँ प्रक्रिया गरिने भएको छ ।
प्रदेश १ निर्वाचन प्रमुख एवं उपसचिव लेवन काश्यप अधिकारीका अनुसार उम्मेदवारको निधन भएपछि निर्वाचन प्रक्रिया अघि बढाउन नयाँ कार्यतालिका सार्वजनिक गरिएको छ ।
कार्यतालिका नयाँ बन्ने भए पनि उक्त क्षेत्रको निर्वाचन मंसिर ४ गते नै हुने छ । निर्वाचन अधिकृतको कार्यालयले निधनका विषयमा निर्वाचन आयोगलाई जानकारी गराएपछि आयोगले निधन भएका उम्मेदवारको दलका हकमा लागू हुने गरी नयाँ कार्यतालिका सार्वजनिक गरेको अधिकारीले बताए ।
कार्यतालिका अनुसार बिहीबारका लागि उम्मेदवारको मनोनयन दर्ता, सूची प्रकाशन र दावीविरोधको समय तोकिएको निर्वाचन अधिकृत रामहरि शर्मा काफ्लले जानकारी दिए ।
उनका अनुसार मनोनयन पत्र र उजुरी उपर जाँचबुझ गर्ने, नाम फिर्ता लिने, उम्मेदवारको अन्तिम नामावली प्रकाशन गर्ने र उम्मेदवारलाई निर्वाचन चिह्न प्रदान गर्ने समय बिहीबार र शुक्रबारलाई तोकिएको छ ।
यसैबीच थापाको निधनको शोकमा बिहीबार प्रदेश १ सरकारले प्रदेशभरि सार्वजनिक बिदा दिएको छ । शोकमा प्रदेश सरकारका सबै सरकारी कार्यालय र सार्वजनिक संघसंस्थाहरुमा बिदा दिइएको हो ।
आन्तरिक मामिला तथा कानुन मन्त्रालयका निमित्त सचिव अर्जुन निरौलाका अनुसार थापाको निधनको शोकमा १ दिनका लागि सार्वजनिक बिदा दिने र राष्ट्रिय झण्डा झुकाउने निर्णय प्रदेश सरकारले गरेको हो ।
डेंगु संक्रमणपछि बिरामी परेका थापालाई निमोनियाँ पनि भएको थियो । उपचारका क्रममा उनको बुधबार बिहान निधन भएको थियो ।
थापाको पथरीशनिश्चरेस्थित डाँस खोलामा शवको अन्त्येष्टि बुधबार साँझ गरिँदैछ ।
त्यसअघि उनको पार्थीव शरीरलाई श्रद्धाञ्जली दिन विराटनगरस्थित नेपाली कांग्रेस मोरङको पार्टी कार्यालयमा डेढ घण्टाजति राखिएको थियो । कांग्रेस नेता डा. शेखर कोइराला, पार्टी प्रवक्ता प्रकाशशरण महत लगायतका नेता, कार्यकर्ताले उनीप्रति श्रद्धाञ्जली अर्पण गरे ।
कांग्रेस मोरङका सचिव मोदराज घिमिरेले थापाको निधनले पार्टीलाई अपूरणीय क्षति पुगेको बताए । कांग्रेसभित्र सधैँ थापाको अभाव खड्किरहने उनको भनाइ छ । घिमिरेका अनुसार थापा पार्टीभित्र इमान्दार र निष्ठावान नेताका रूपमा परिचित थिए । निधनको शोकमा ३ दिनसम्म पार्टीको झण्डा झुकाउने निर्णय भएको उनको भनाइ छ ।
