बुवाको कुटाइबाट दुई वर्षीया बालिकाको मृत्यु

गुगल नक्सा

विराटनगर । ओखलढुंगाको सिद्धिचरण नगरपालिका–३ अँधेरीका ३५ वर्षीय राजेन्द्र राईले सोमबार राति दुई वर्षीया छोरी ऋतिका राईको हत्या गरेका छन् ।

श्रीमती २१ वर्षीया उषा राईलाई कुटपिट गरी घाइते बनाएको प्रहरीले जनाएको छ। उषाको ओखलढुंगा सामुदायिक अस्पताल मिसनमा उपचार भइरहेको छ ।

प्रहरीका अनुसार मादक पदार्थ सेवन गरेका राई र श्रीमती उषाबीच विवाद भएको थियो । त्यही क्रममा विवाद चर्किएपछि उनले श्रीमतीमाथि आक्रमण गरेका थिए ।

प्रहरीका अनुसार आक्रमण गर्न थालेपछि छोरी लिएर भाग्न खोजेकी श्रीमतीबाट उनले छोरी खोसेका थिए । श्रीमती भने भागेकी थिइन् । घटनास्थलमा प्रहरी पुग्दा छोरी मृत अवस्थामा भेटिएकी थिइन् ।

हातमा खुकुरी बोकेर घरभित्रबाट सबैलाई आक्रमणको प्रयास गरेका राईले आफ्नै टाउकामा पनि खुकुरी प्रहार गर्दा घाइते भएका छन् । उनको ओखलढुंगा सामुदायिक अस्पतालमै उपचार भइरहेको छ ।