समाजको प्रतिचित्र : घिमिरेको ‘सोइसोइला’

विराटनगर । उपन्यासकार परशुराम घिमिरेको उपन्यास ‘सोइसोइला’ सार्वजनिक भएको छ । सांग्रिला प्रकाशनबाट प्रकाशित उक्त उपन्यास पूर्वाञ्चल साहित्य प्रतिष्ठान विराटनगरको आयोजनामा दिल्ली पब्लिक स्कुलको सभाकक्षमा विमोचन गरिएको हो ।

कृतिमाथि समालोचक भूषण ढुङ्गेल, सीमा आभासले समीक्षात्मक टिप्पणी गरेका थिए ।

उपन्यास हाम्रै समाजको प्रतिचित्र रहेको र यसमा कल्पनाभन्दा बढी यथार्थ रहेको विचार समीक्षक र स्रष्टाहरुको थियो ।

महेन्द्र मोरङ क्याम्पसका प्रमुख डा. बाबुराम तिम्सिनाले शुभकामना व्यक्त गरेका थिए । उपन्यासकार घिमिरेले कृति सिर्जना र विषय सम्बन्धमा प्रकाश पारेका थिए ।

कार्यक्रम समालोचक दधिराज सुवेदीको प्रमुख आतिथ्य र प्रतिष्ठानका अध्यक्ष प्राज्ञ विवश पोखरेलको अध्यक्षतामा सम्पन्न भएको थियो ।

आमन्त्रित अतिथिहरूको स्वागत कवि दिङलाली कान्छो र सञ्चालन प्रतिष्ठानका महासचिव गोकुल अधिकारीले गरेका थिए । समारोहमा साहित्यकारहरुको बाक्लो उपस्थिति थियो ।