विराटनगर । उपन्यासकार पर्वतकुमार श्रेष्ठको नयाँ कृति ‘समयको छाल’ शनिबार सार्वजनिक गरिएको छ । विराटनगरको हाटखोलास्थित आरोहण गुरुकुलमा आायोजित कार्यक्रममा उक्त कृति सार्वजनिक गरिएको हो ।
पूर्वाञ्चल साहित्य प्रतिष्ठान विराटनगरको आयोजनामा भएको कार्यक्रममा विभिन्न व्यक्तिहरुले समीक्षा गरेका थिए । उपन्यास ‘सम्पूर्ण किताब’ ले प्रकाशन गरेको हो ।
उपन्यासमा, ग्रामीण जनजीवनका यथार्थलाई कलात्मक रूपमा प्रस्तुत गरिएको धारणा उनीहरुको थियो । कृतिमाथि समालोचक कृष्ण वस्ती, समालोचक दधिराज सुवेदी, विश्लेषक दिनेश श्रेष्ठ र कवि शुभलक्ष्मी लम्सालले समीक्षात्मक टिप्पणी गरेका थिए ।
प्रमुख अतिथि प्रा. डा. गोपाल भण्डारी, समारोहका अध्यक्ष प्राज्ञ विवश पोखरेल, उपाध्यक्ष भूषण ढुङ्गेलले बधाईसंँगै उपन्यासकारलाई शुभकामना दिएका थिए ।
प्रतिष्ठानका महासचिव गोकुल अधिकारीले सञ्चालन गरेको कार्यक्रममा विराटनगरका सर्जकहरुको सहभागिता थियो ।
