विराटनगर । धनकुटाको धनकुटा नगरपालिका–९ मुलघाटमा मलामी बोकेको ट्याक्टर दुर्घटना हुँदा १३ जना घाइते भएका छन् । घाइतेमध्ये ४ जनाको अवस्था गम्भीर छ ।
प्रहरीका अनुसार मलामी बोकेर बेलहरातर्फ जाँदै गरेको को २ त १९१४ नम्बरको ट्याक्टर शुक्रबार दिउँसो दुर्घटनामा परेको हो । दुर्घटनामा धनकुटा–९ का ४५ वर्षीय दुर्गा न्यौपाने, ४० वर्षीय अडिमर्दन कार्की, २५ वर्षीय मिलन राई र ५६ वर्षीय यज्ञबहादुर दमाई गम्भीर घाइते भएका छन् ।
त्यस्तै २८ वर्षीय विक्रम थिङ, ३८ वर्षीय लोकबहादुर भण्डारी, ४० वर्षीय रविन राई, ५१ वर्षीय नरबहादुर विक, ५६ वर्षीय राजु राई, ५८ वर्षीय झमक श्रेष्ठ, ५० वर्षीय पदम कोइराला, ३९ वर्षीय जीवन तामाङ र ३८ वर्षीय शेरबहादुर कार्की पनि घाइते भएका छन् । घाइतेहरुलाई थप उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएको छ ।
ट्याक्टर चालक धनकुटा–९ का २० वर्षीय रोशन राई फरार रहेकाले खोजी भइरहेको प्रहरीले जनाएको छ । राईले सवारी चालक अनुमति पत्र (लाइसेन्स) प्राप्त नगरिकन ट्याक्टर चलाएको पाइएको प्रहरीले जनाएको छ ।
