विराटनगर । झापामा स्कुटरले ठक्कर दिँदा शुक्रबार साँझ एक जना भारतीय नागरिकको मृत्यु भएको छ ।
पूर्व–पश्चिम लोकमार्गअन्तर्गत झापाको मेचीनगर नगरपालिका–६ काली खोलानजिक पूर्वतर्फ जाँदै गरेको मे ११ प २९१७ नम्बरको स्कुटरले साइकल यात्री भारतीय नागरिकलाई ठक्कर दिएको थियो । ठक्करबाट साइकल यात्री भारत खोरीबारीका अन्दाजी २६ वर्षीय रमन सिंहको मृत्यु भएको प्रहरीले जनाएको छ ।
प्रहरीका अनुसार दुर्घटनामा परेर गम्भीर घाइते भएका सिंहको उपचारका क्रममा बिर्तामोडको बी एन्ड सी अस्पतालमा साँझ ७ः४० बजेतिर मृत्यु भएको हो । साइकललाई ठक्कर दिएपछि अनियन्त्रित बनेको स्कुटरको पछाडि सवार मेचीनगर–७ का २१ वर्षीय विकाश राजवंशी पनि घाइते भएका छन् ।
दुर्घटनालगत्तै प्रहरीले स्कुटर र चालक मेचीनगर–७ का १८ वर्षीय मोहमद अफतावलाई नियन्त्रणमा लिएर घटनाको अनुसन्धान सुरु गरेको छ । अफतावले सवारी चालक अनुमति पत्र (लाइसेन्स) प्राप्त नगरिकन स्कुटर चलाएको पाइएको छ ।
