विराटनगर । भरुवा बन्दुक देखाउँदै पत्नी (श्रीमती)लाई कुटपिट गरेको आरोपमा मोरङको उर्लाबारीबाट प्रहरीले बुधबार साँझ एक जना युवकलाई पक्राउ गरेको छ ।
मोरङ प्रहरीका प्रवक्ता डीएसपी दीपक श्रेष्ठका अनुसार भरुवा बन्दुकसहित उर्लाबारी नगरपालिका–२ का ३१ वर्षीय दीपक विश्वकर्मालाई पक्राउ गरिएको हो । मादक पदार्थ सेवन (मापसे) गरेका विश्वकर्माले भरुवा बन्दुकले डर त्रास देखाउँदै पत्नीलाई कुटपिट गरेको प्रारम्भिक अनुसन्धानबाट खुलेको उनले बताए ।
पत्नीमाथि कुटपिट गरिरहेको सूचना पाएर प्रहरी घटनास्थलमा पुगेको थियो । अस्थायी प्रहरी चौकी मंगलबारेबाट खटिएको टोलीले विश्वकर्मालाई नियन्त्रणमा लिएर घर खानतलासी गर्दा बन्दुक पनि फेला परेको डीएसपी श्रेष्ठले बताए ।
उनका अनुसार पत्नीलाई बन्दुकको कुन्दाले समेत कुटपिट गरेको पाइएको छ । विश्वकर्माविरुद्ध हातहतियार खरखजना मुद्दा चलाउन अदालतबाट बिहीबार म्याद थप गरेर घटनाको बाँकी अनुसन्धान अघि बढाइएको प्रहरीले जनाएको छ ।
