विराटनगर । मोरङको बेलबारी नगरपालिका–५ कसेनीस्थित नालीमा मंगलबार बिहान एक जना पुरुष मृत फेला परेका छन् ।
बाटोको पश्चिम साइडको नालीमा बेलबारी–५ का ४४ वर्षीय कृपराज मगरको शव फेला परेको हो । नालीमा शव रहेको जानकारी बिहान ७ बजेतिर प्रहरीले प्राप्त गरेको थियो ।
तत्काल घटनास्थलमा पुगेको इलाका प्रहरी कार्यालय बेलबारीका प्रहरी निरीक्षक खगेन्द्र धमला नेतृत्वको टोलीले शवलाई पोस्टमार्टमका लागि विराटनगरको कोसी अस्पताल पठाएर घटनाको अनुसन्धान सुरु गरेको छ । प्रहरीका अनुसार नालीमा घोप्टो परेको अवस्थामा शव भेटिएको हो ।
मगरको मृत्युको कारण खुल्न सकिरहेको छैन । पोस्टमार्टम रिपोर्ट र घटनाको अनुसन्धानबाट मृत्युको कारण पत्ता लाग्ने प्रहरीले जनाएको छ ।
