दधिराज सुवेदी, अनन्तराज न्यौपाने र सनत रेग्मी
विराटनगर । विराटनगरका अग्रज साहित्यकार एवं समाजसेवी दधिराज सुवेदीको सम्मानमा उनका छोराहरुले स्थापना गरेको पुरस्कार बाँकेका कथाकार सनत रेग्मी र विराटनगरका पत्रकार अनन्तराज न्यौपानेलाई प्रदान गरिने भएको छ ।
दधिराज सुवेदी पुरस्कार प्रतिष्ठानले यस वर्षको दधिराज सुवेदी भाषा साहित्य पुरस्कार कथाकार रेग्मीलाई प्रदान गर्ने निर्णय गरेको हो । पुरस्कारको राशि ५१ हजार रुपैयाँ छ ।
यसैगरी दधिराज सुवेदी पत्रकारिता पुरस्कार पत्रकार न्यौपानेलाई प्रदान गर्ने निर्णय भएको प्रतिष्ठानले जनाएको छ । यो पुरस्कारको राशि २५ हजार रुपैयाँ छ ।
ती पुरस्कार यसअघि भाषाविद चूडामणि बन्धु, पत्रकार तथा कार्यक्रम प्रस्तोता भूषण दाहाल, साहित्यकारहरू प्रा. डा. गोविन्दराज भट्टराई , प्रा. डा. अभि सुवेदी, प्रा. डा. माधवप्रसाद पोखरेल, डा. विष्णुविभु घिमिरे र एस्पी कोइरालालाई प्रदान गरिएको थियो ।
यसैगरी पत्रकारहरू हरिबहादुर थापा, शिवबहादुर कार्की, मोहन भण्डारी र किशोर नेपाललाई पत्रकारिता पुरस्कार प्रदान गरिएको थियो ।
बरिष्ठ साहित्यकार एवं समालोचक प्राज्ञ दधिराजका छोराद्वय शरदराज सुवेदी र रुपकराज सुवेदीले स्थापना गरेको १५ लाख रुपैयाँको अक्षय कोषको ब्याजबाट हरेक वर्ष यो पुरस्कार प्रदान गरिदै आएको छ ।
