काठमाडौं । नेपाली राष्ट्रिय फुटबल टोलीकी कप्तान एन्जिला तुम्बापो सुब्बा भारतीय महिला फुटबल लिग (आईडब्ल्यू) क्लब सेथु एफसीमा आबद्ध भएकी छिन् ।
नेपाली टोलीको पहिलो रोजाइको गोलरक्षकको भूमिका निर्वाह गरिरहेकी उनलाई क्लबले एक वर्षका लागि अनुबन्धित गरेको हो ।
सुब्बा नेपालबाट आईडब्ल्यू खेल्ने तेस्रो खेलाडी हुन् । यसअघि नेपाली फरवार्डद्वय सावित्रा भण्डारी ‘साम्बा’ र अनिता बस्नेतले सोही क्लबबाट आईडब्ल्यू खेलेका थिए ।
हाल साम्बा अर्काे आईडब्ल्यू क्लब गोकुलम केरला एफसीमा आबद्ध छिन् भने बस्नेत नेपाली महिला फुटबल लिगका लागि एपिएफ क्लबसँग आबद्ध छिन् ।
गोलरक्षक सुब्बाका लागि आईडब्ल्यू दोस्रो अन्तर्राष्ट्रिय लिग हो । यसअघि उनले पाकिस्तानमा आयोजना भएको नेशनल वुमेन्स फुटबल च्याम्पियनसिपमा सहभागिता जनाइसकेकी छिन् ।
लिग आफ्नो लागि नयाँ कुरा सिक्ने र क्षमता प्रदर्शन गर्ने राम्रो मौका भएको सुब्बाले प्रतिक्रिया दिएकी छिन् ।
एपिएफ क्लबसँग आबद्ध रहेकी उनी स्थगित रहेको नेपाली महिला लिगका दोस्रो राउन्ड सुरू नभए डिसेम्बरमा आईडब्ल्यू खेल्न भारत प्रस्थान गर्ने छिन् ।
