निर्वाचन संग्राममा फरक प्रवृत्तिबीच प्रतिस्पर्धा हुँदैछः प्रचण्ड

विराटनगर । माओवादी केन्द्रका अध्यक्ष पुष्पकमल दाहाल प्रचण्डले आगामी आमनिर्वाचन ‘संग्राम’ का रूपमा हुन लागेको भन्दै त्यसमा दुई फरक प्रवृत्तिका बीचमा प्रतिस्पर्धा हुने बताएका छन् ।

विराटनगरमा शनिबार आयोजित सत्ता गठबन्धनको संयुक्त भेलालाई सम्बोधन गर्दै उनले जनयुद्ध र जनआन्दोलनपछि संविधान निर्माण भएको र अहिले ‘गोरू गाडावालाले टाउको उठाउन खोजेको’ टिप्पणी गरे ।

आफूहरुको गठबन्धन १२ बुँदे सहमतिको पक्षपातीहरूको गठबन्धन भएको भन्दै उनले अर्को गठबन्धन गोरूगाडावाला गठबन्धन भएको टिप्पणी गरे । १मंसिर ४ गते एउटा ठूलो संग्राम हुँदैछ’ उनले भने ।

विस्तृत शान्ति सम्झौता र संविधान रक्षाका लागि काँग्रेससहितको गठबन्धन निर्माण गरिएको उनले बताए । ओलीले धोका दिएपछि आफूले ज्ञान प्राप्त गरेको बताउँदै प्रचण्डले सहमति, सहकार्यको संस्कृति निर्माण शान्ति सम्झौतापछि भएकोले एकअर्कालाई सहयोग गर्न कार्यकर्तालाई आग्रह पनि गरे ।