बेलायतको संसद भवन ।
काठमाडौं । बेलायती प्रधानमन्त्री लिज ट्रसले नियुक्त भएको ६ हप्तामै राजीनामा दिएपछि नयाँ प्रधानमन्त्रीको खोजी सुरु भएको छ । आगामी साताको अन्त्यसम्ममा सत्तारुढ पार्टीका नेताले भावी प्रधानमन्त्रीको टुङ्गो लगाउने जनाइएको छ । त्यसबेलासम्म ट्रस सत्तामा कायम रहने छिन् ।
बेलायतको इतिहासमा ४५ दिनमै राजीनामा दिएकी उनी सबैभन्दा छोटो समय सत्तामा रहने प्रधानमन्त्री बनेकी छन् ।
गम्भीर आर्थिक संकट तथा नीतिगत रुपमा सोच्न नसकिने गरी लिएको ‘यू–टर्न’ का कारण ट्रस विवादित रहिन् । बोरिस जोन्सनले राजीनामा दिएपछि लामो प्रक्रिया पूरा गरेर ट्रस प्रधानमन्त्री बनेकी थिइन् ।
अब नयाँ प्रधानमन्त्रीको खोजीमा कन्जरभेटिभ (ट्रोय) पार्टीका नेता लागेका हुन् । प्रधानमन्त्री बन्न चाहने नेताले ट्रोयका कम्तीमा १०० सांसदको समर्थनमा मनोनयन दर्ता गर्नु पर्नेछ । यसको अर्थ ३५७ सांसद रहेको ट्रोयका तीन नेताले मात्रै उम्मेदवारी दिन सक्ने छन् ।
अहिलेसम्म कुनै नेताले पनि आफूले उम्मेदवारी दिने औपचारिक रुपमा बताएका छैनन् । तर सम्भावित उम्मेदवारको सूचिमा यसअघि ट्रससँग पराजित भएका ऋशी सुनक, पेनी मोर्डन्ट, बोरिस जोन्सन, बेन वालस र किमी बाड्नोचसहितका नेताको नाम चर्चामा छ ।
कन्जरभेटिभ पार्टीका केही नेताहरुले सुनकलाई आफ्नो समर्थन रहेको बताइसकेका छन् । ट्रसमाथि प्रश्न गरेकी पेनीलाई पनि भावी प्रधानमन्त्रीका रुपमा हेरिएको छ । यसअघि पनि उनी प्रतिस्पर्धामा थिइन्, तर अन्तिम दुईमा पर्न सकेकी थिइनन् ।
पूर्व प्रधानमन्त्री जोन्सनलाई पनि योपटक उम्मेदवारका रुपमा लिइएको छ । जोन्सनले गत जुलाईमा राजीनामा दिएका थिए ।
रक्षा मन्त्री बेन वालसलाई पार्टीका केही सांसदहरुले सुरक्षित उम्मेदवारका रुपमा लिएका छन् । यस्तै केमीलाई पार्टीभित्र तीव्र गतिमा चर्चा बटुल्दै गएकी नेताका रुपमा लिने गरिएको छ । उनले पनि आउँदो प्रतिस्पर्धामा महत्व राख्ने बेलायती सञ्चारमाध्यमले उल्लेख गरेका छन् ।
