पोखरा । नवौँ राष्ट्रिय खेलकुद प्रतियोगिता बिहीबार समापन हुँदैछ । गण्डकी प्रदेशका विभिन्न आठ जिल्लामा प्रतियोगिताका खेलहरु सञ्चालन गरिएको थियो ।
राष्ट्रिय खेलकुद परिषद्का अनुसार दिउँसो २ः३० बजेपछि पोखरा रङ्गशालामा भव्य कार्यक्रमसहित प्रतियोगिताको समापन गरिने छ ।
समापन समारोहमा प्रधानमन्त्री शेरबहादुर देउवा, युवा तथा खेलकुदमन्त्री महेश्वरजङ्ग गहतराज, गण्डकी प्रदेशका मुख्मन्त्री कृष्णचन्द्र नेपाली पोखरेललगायतका विशिष्ट व्यक्ति सहभागी हुने जनाइएको छ।
असोज २८ गते राष्ट्रिय खेलकुदको उपराष्ट्रपति नन्दबहादुर पुनले उद्घाटन गरेका थिए।
प्रतियोगिता प्रचारप्रसार उपसमितिका सचिव खुसराज दाहालका अनुसार समापन समारोहमा विभिन्न सांस्कृतिक कार्यक्रम, कलाकारबाट गीत प्रस्तुत, झाँकी, गीत सङ्गीत तथा नृत्यलगायतका कार्यक्रम गरिनेछ।
हालसम्म विभागीय त्रिभुवन आर्मी क्लवले तीन सय १४ पदक जितेर शीर्ष स्थानमा छ। प्रतियोगितामा सेना च्याम्पियन बन्ने निश्चित भएको हो। उसले एक सय ५० स्वर्ण, ९४ रजत र ७० कास्य पदक जितेको छ।
यसैगरी, नेपाल पुलिस क्लबले ५२ स्वर्ण, ४७ रजत र ५९ कास्यसहित एक सय ५८ पदकसहित द्वितीय र एपिएफले ४२ स्वर्ण, ५७ रजत र ७७ कास्यसहित एक सय ७६ पदक जितेको छ।
आयोजक गण्डकी प्रदेश प्रदेशमा पदकमा अग्रस्थानमा छ। गण्डकीले हालसम्म २९ स्वर्ण, २८ रजत र ४९ कास्यसहित एक सय छ पदक जितेको छ।
बागमती प्रदेशले २२ स्वर्ण,४२ रजत र ५९ कास्यसहित एक सय २३ पदक, एनआरएनएले १० स्वर्ण आठ रजत र छ कास्यसहित २४ पदक, प्रदेश नं १ ले नौ स्वर्ण, २२ रजत र ४४ कास्यसहित ७५ पदक, सुदूरपश्चिम प्रदेशले आठ स्वर्ण छ रजत र ३३ कास्यसहित ४७ पदक र मधेस प्रदेशले पाँच स्वर्ण, आठ रजत र २१ कास्यसहित ५९ पदक जितेका छन्।
लुम्बिनी प्रदेशले चार स्वर्ण, १८ रजत र ३७ कास्यसहित ५९ पदक जित्दा कर्णाली प्रदेश दुई स्वर्ण, तीन रजत र ११ कास्यसहित १६ पदक जितेर पदक तालिकाको पुछारमा छ।
दशौं संस्करण कर्णालीमा
यसैबीच, नवौँ राष्ट्रिय खेलकुदको औपचारिक समापनसँगै बिहीबार कर्णाली प्रदेशलाई १० औँ राष्ट्रिय खेलकुदका लागि झन्डा हस्तान्तरण गरिँदैछ।
बुधबार राति बसेको राष्ट्रिय खेलकुद परिषदको बोर्ड बैठकले कर्णालीमा २०८१ को राष्ट्रिय खेल गर्नका लागि स्वीकृत दिए पनि प्रतियोगिताको मितिको टुंगो लगाउन बाँकी रहेको जनाइएको छ ।
