विराटनगरमा घरबहाल कर अबदेखि महानगरले उठाउने

विराटनगर । घर बहाललगायत कर विराटनगर महानगरपालिका आफैंले उठाउने भएको छ । उक्त कर आन्तरिक राजस्व कार्यालयले उठाउँदै छ । महानगरपालिकाको समन्वयमा आन्तरिक राजस्व कार्यालय विराटनगरले बुधबार आयोजना गरेको कार्यक्रममा यस्तो जानकारी दिइएको हो ।

कार्यक्रममा महानगरका मेयर नागेश कोइरालाले घर बहाल कर महानगरले नै उठाउने बताए । उनले अबदेखि महानगरमै आएर घर बहाल कर तिर्न स्थानीयलाई आग्रह गरे ।

कार्यक्रममा सहभागी वडाध्यक्षहरुले आफ्ना वडाहरुमा ठूल–ठूला व्यावसायिक फर्महरु भए पनि आफूहरुले कर संकलन गर्न नसकेको बताएका थिए ।

धेरै व्यवसायीहरु करको दायराभन्दा बाहिर रहेको भन्दै वडाध्यक्ष तथा कार्यपालिका सदस्यहरुले महानगरको विकासका लागि कर संकलनमा कठोर बन्नुपर्नेमा जोड दिएका थिए ।

आन्तरिक राजस्व कार्यालयका प्रमुख डा. डिवी क्षेत्री र कर अधिकृत विमल पौडेलले स्थानीय तहले लिन सक्ने करका किसिम र करको सदुपयोगका विषयमा कार्यपत्र प्रस्तुत गरेका थिए ।

कर संकलनका लागि महानगर र आन्तरिक राजस्व कार्यालय एकअर्काका पपिूरक भएकाले आगामी दिनमा दुवै निकायबीच समन्वय गरेर अगाडि बढ्ने महानगरका प्रमुख प्रशासकीय अधिकृत विष्णुप्रसाद कोइरालाले जानकारी दिए ।