उदयपुर । लगानी थप गरी व्यवस्थित पार्न सके उदयपुर सिमेन्ट उद्योग पूर्ण सञ्चालन हुन सक्ने जनाइएको छ । उद्योग पूर्ण रुपमा सञ्चालन भए आम्दानीमा पनि उल्लेख्य वृद्धि हुने उद्योगका अधिकारीले जनाएका हुन् ।
उद्योगका प्रवक्ता लक्ष्मण पोखरलेका अनुसार ५६ करोड ७२ लाख थप लगानी गर्न सके उद्योगको पुनःनिर्माण गरी पूर्ण क्षमतामा सञ्चालन गर्न सकिने छ ।
त्यसरी सञ्चालन भएपछि तीन वर्षभित्रै नेपाल सरकारबाट लिएको ऋणको साँवा ब्याज फिर्ता गरिसक्ने प्रतिवद्वतासहित उद्योग, बाणिज्य तथा आपूर्ति मन्त्रालयको सिफारिस अर्थ मन्त्रालयमा विचाराधीन रहेको प्रवक्ता पोखरेलले जनाए ।
उदयपुर सिमेन्ट उद्योग लिमिटेडले उच्च गुणस्तरको चुनढुंगा प्रयोग गरी अब्बल ग्रेडको गुणस्तरयुक्त गैंडाछाप सिमेन्ट उत्पादन गरिरहेको छ । आर्थिक वर्ष २०७८/७९ मा २१ लाख ७२ हजार ४१९ बोरा सिमेन्ट बिक्री गरेकामा चालु आर्थिक वर्षमा २५ लाख बोरा सिमेन्ट बिक्री गर्ने लक्ष्य उद्योगको छ ।
लक्ष्य हासिल गर्न गत आर्थिक वर्षको उत्पादन उपलब्धि ४१ प्रतिशतलाई वृद्धि गरी उद्योगको कूल क्षमता ८ सय मेट्रिकटन पुर्याउन प्राविधिक अध्ययन गराई फेर्नुपर्ने मेसिनहरुको अनुमानित मूल्यसहित सरकारलाई ऋण लगानीका लागि अनुरोध गरिएको जनाइएको छ ।
गत वर्ष ‘बिइपी’ मा गइसकेको उद्योग अहिलेको परिस्थितिमा डिजेल, कोइला तथा अन्य कच्चापदार्थको भाउ अत्यधिक बढेको कारण एवं कर्मचारीको सेवा सुविधा वृद्धि भएको कारण लागत बढेको दाबी गरिएको छ ।
त्यस्तो अवस्थामा उद्योग फेरि नोक्सानीमा जान सक्ने अवस्थालाई रोक्न उद्योगको नयाँ प्रविधि जडान गरी कोइलाको खपत कम गर्न उक्त लगानी आवश्यक रहेको प्रवक्ता पोखरेलले बताए ।
अधिकांश कर्मचारी अबको चार–पाँच वर्षभित्र अवकाश प्राप्त गर्दैछन् । त्यसबेला उनीहरुले पाउने अर्बौंको सुविधाको सरकारी दायित्व समेत उद्योगको क्षमता बिस्तार भएको खण्डमा मात्र पाइने अवस्था रहेको उल्लेख गरिएको छ ।
२०७८ असोजसम्म अवकाश प्राप्त कर्मचारीले १५ करोड रकम प्राप्त गरिसकेका छन् । २०७७ माघअघि बन्द रहेको उद्योग महाप्रबन्धक गोपीकृष्ण न्यौपानेले जिम्मेवारी सम्हालेपछि कच्चापदार्थ तथा अन्य समस्याहरु समाधानको पहल भएको थियो ।
आर्थिक वर्ष २०७७/७८ मा एनएफआरएस अन्तर्गत वित्तीय विवरण तयार गरी त्यस वर्षसम्मको ५ अर्ब ५० करोड नोक्सानी कट्टा गर्दा ५६ करोड सञ्चित मुनाफा कायम भएको प्रवक्ता पोखरेलले बताए ।
संगठन तथा व्यवस्थापन सर्भे, कम्पनीको १५ बर्षको साधारणसभा सम्पन्न, प्लाण्ट मर्मतसम्भार, आन्तरिक तथा वाह्य लेखापरीक्षण, कम्पनी स्थापना हुँदादेखिको कम्पनी रजिस्ट्रारको कार्यालयमा रेकर्ड अद्यावधिक गर्ने काम गरिएको छ ।
जस्ता महत्त्वपूर्ण कार्यहरु महाप्रबन्धक न्यौपानेको कार्यकालमा सम्पन्न भएका छन, सूसासनको दृष्टिकोणले यी कामहरु निकै महत्त्वपूर्ण रहेको प्रवक्ता पोखरेलले जनाए ।
उत्पादन बृद्वि गरिएअनुसार २०७७/७८ मा ३० करोड नोक्सानी भएकोमा आर्थिक वर्ष २०७८/७९ मा खर्च मितव्ययिता अपनाएर धेरै वर्षपछि उद्योग नाफामा गएको छ ।
पछिल्लो समयमा उद्योग भित्रका क्रियाशील ट्रेड युनियनहरुले उद्योग सञ्चालनको नियमियता लगायत केही माग राखी पेस गरेको ज्ञापनपत्रको बारेमा समेत महाप्रबन्धकसमेत बसी छलफलमा सहमति गरिएको जनाइएको छ ।
