घर बनाउन सुरू गरे, आवास कार्यक्रमको रकम पाएनन्

गगन नुनिया

विराटनगर । मोरङको धनपालथान गाउँपालिका वडा नम्बर १ मा सञ्चालित ‘समुदाय सुरक्षित नागरिक आवास कार्यक्रम’ बाट स्थानीय बासिन्दा पीडित बनेका छन् ।

कार्यक्रमअन्तर्गत पराल वा खरको छाना भएको घर परिवारलाई जस्तापाताको छाना लगाइदिने योजना थियो ।

प्रत्येक स्थानीय तहमा रहेका पराल वा खरको छाना भएका घर परिवार नछुटने गरी शहरी विकास तथा भवन निर्माण मन्त्रालयले २०७५ तिर योजना ल्याएको थियो ।

योजनामा दुई किस्तामा ६० र ४० प्रतिशत रकम दिने भनिएको थियो । तर पहिलेका जनप्रतिनिधिले तीन किस्तामा वितरण गर्ने भने पनि लक्षित वर्गले दुई किस्ता मात्र रकम पाएको गुनासो गरेका छन् ।

उक्त कार्यक्रमबाट पहिलो किस्ता सहयोग लिएका उक्त बस्तीका एकजना बासिन्दाले घर बनाउन सुरु गरे पनि पछि रकम नदिइएकाले अलपत्र परेको बताए । घर बनाउन ऋण लिनुपरेको उल्लेख गर्दै उनले कार्यक्रमबाट सहयोग पुग्ला भन्ने ठानेको तर उल्टै ऋणमा डुब्नु परेको सुनाए ।

गुनासो लिएर जाँदा कार्यालयमा कर्मचारी नभेटिने गरेको गुनासो पनि स्थानीय दलित परिवारका अगुवाको भनाइ छ ।

घर बनाउन सहयोग पाइन्छ भनेर जस्तापाता बाहेकको सबै सामान किनेको तर रकम पाउन नसकेको कतिपयले बताएका छन् ।

घरका लागि ५० हजार रुपैयाँ पाइने भएपछि बनाउन सुरु गरेको तर रकम नपाउँदा उल्टै आफैंले ऋण खोजेर दुई लाखभन्दा बढी खर्च गर्नुपरेको एकजना पीडितले बताए ।

धनपालथान गाउँपालिका वडा का अध्यक्ष खाजा हुसेन मियाका अनुसार सोमबार अनुगमन गरी मङगलबार सिफारिस गर्ने योजना छ ।

पहिलेका जनप्रतिनिधिले के कसो गरे भन्नेबारे आफूलाई जानकारी नभएको उल्लेख गर्दै उनले आफूले त्यसबारे बुझ्ने काम गरिरहेको बताए ।

झापादेखि पर्सासम्मका ११ जिल्लामा जनसंख्याको करिब ३० प्रतिशत दलित रहेको अनुमान छ ।

(प्रशिक्षार्थी)