झापा । बिर्तामोडमा रहेको मनमोहन सामुदायिक अस्पतालमा एक पुरुषको पिसाब थैलीबाट करिब ढुंगा बन्न लागिसकेको कण्डम निकालिएको छ ।
३५ वर्षीय पुरुषको पिसाब थैलीबाट शल्यक्रिया गरेर कण्डम निकालिएको अस्पतालका निर्देशक रोमनी भट्टराईले जानकारी दिए।
ती पुरुषको बिहीबार शल्यक्रिया गरिएको थियो । उनको शल्यक्रिया मूत्ररोग विशेषज्ञ डा. सरोजकुमार यादवले गरेका थिए ।
कण्डम पुरुषको पिसाब थैलीमा कसरी पस्यो भन्ने कुराले अचम्ममा पारेको डा. यादवले बताए । उनले भने, ‘पुरुषको पिसाब थैलीमा कण्डम पस्ने अवस्था नै हुँदैन । कि उसैले बाहिरबाट घुसारेको हुनुपर्छ । त्यो पनि कसरी सम्भव भयो होला र !’
ती पुरुष अहिले शल्यक्रिया गरेर स्वास्थ्य लाभ गरिरहकाले सोधपुछ नगरिएको अस्पताल प्रशासनले जनाएको छ ।
अस्पतालका निर्देशक भट्टराईले भने, ‘शनिवार आउनु न । सँगै सोधौंला बिरामीलाई।’
–उमाकान्त खनालको यो रिपोर्ट देशसञ्चारबाट साभार गरिएको हो ।
