विराटनगर । आगामी प्रतिनिधि तथा प्रदेशसभा निर्वाचनसँगै नजिकिँदो तिहार, छठसमेतका चाडपर्वलाई केन्द्रित गरेर सशस्त्र प्रहरीले प्रदेश १ का सीमा क्षेत्रमा नियमित गस्ती बढाएको छ ।
काउन्टर पार्टससँग समेत समवन्य गरेर सशस्त्रले नेपाल–भारत सीमा क्षेत्र केन्द्रित नियमित एवं आकस्मिक गस्ती थालेको हो । भारतसँग खुला सीमा जोडिएका प्रदेश १ का झापा, मोरङ र सुनसरीमा सशस्त्रले गस्ती बढाएको छ । सीमा सुरक्षा तथा चोरी तस्करी नियन्त्रणको मुख्य जिम्मेवारी पाएको सशस्त्रले दिवा तथा रात्रिकालीन गस्तीलाई प्राथमिकतामा राखेर सीमा क्षेत्रमा सक्रियता बढाएको हो ।
गस्तीसँगै संवेदनशील एवं शंकास्पद स्थानमा चेक पोइन्ट थाप्ने, साइकल तथा मोटसाइकल गस्ती परिचालन, सीमा लगायत सबै क्षेत्रको सूचना संकलन, सुरक्षा व्यवस्था मजवुत बनाउन सबै पक्षसँग समन्वय गर्ने काम सशस्त्रले गरिरहेको छ । त्यसका लागि सशस्त्र प्रहरी बल प्रदेश १ का प्रमुख डीआईजी कमल गिरीले सशस्त्र प्रहरी निरीक्षक (इन्सपेक्टर)को नेतृत्वमा अलगअलग टोली परिचालन गरेका छन् ।
जिल्लागत हिसाबले परिचालित टोलीको अनुगमनका लागि गिरीले छुट्टै टोली पनि खटाएका छन् । प्रदेश १ मा भारतसँग खुला सीमा रहेका तराईका तीनवटै जिल्लामा नियमित गस्ती सुरु गरेर त्यहाँको वस्तुस्थितिका बारेमा जानकारी लिने काम भइरहेको सशस्त्र प्रहरी बल प्रदेश १ का प्रवक्ता एसएसपी विश्व भट्टराईले जानकारी दिए । उनका अनुसार सीमा इलाकाको अनुगमन तथा सीमा क्षेत्रबाट हुने अवैध कारोबार एवं ओसारपसार नियन्त्रणको मुख्य उदेश्य राखेर सक्रियता बढाइएको छ ।
‘तिहार, छठ लगायतका चाडपर्व पनि नजिकिँदै छन् । चाडपर्वमा सीमा क्षेत्रबाट चोरी तस्करीलगायत अवैध सामान ओसापसारको सम्भावना बढी हुन्छ,’ एसएसपी भट्टराईले भने, ‘मंसिर ४ गतेको निर्वाचनलाई लक्षित गरेर सुरक्षा सक्रियता बढाउनुपर्ने अवस्था छ । त्यही भएकाले सीमा क्षेत्रमा नियमित गस्ती सुरु गरिएको हो ।’ सशस्त्रको सक्रियताले सीमा अपराध, चाडपर्वका समयमा हुने अवैध गतिविधि तथा नजिकिँदो निर्वाचनमा हुनसक्ने घुसपैठ रोक्न मद्धत पुग्ने उनले बताए ।
सशस्त्रले दुई देशीय सीमा क्षेत्रको अवलोकन गरेर सीमास्तम्भको अवस्थाका बारेमा समेत जानकारी लिन थालेको छ । बदलिँदो सुरक्षा चुनौतीलाई मध्यनजर गरेर सीमा क्षेत्रमा शान्ति सुरक्षाको अवस्था मजवुत बनाउन सशस्त्र सक्रिय बनेको भट्टराईको भनाइ छ । उनका अनुसार सशस्त्रको उपस्थिति मजवुत बनाएर सीमा क्षेत्रका जनतालाई शान्ति सुरक्षाको प्रत्याभूति दिलाउनका लागि अपराधजन्य गतिविधि रोक्न सबै उपाय अवलम्बन गरिने छ ।
त्यसका लागि लामो दूरीको गस्ती परिचालन गरेर सिमावर्ती क्षेत्रको अनुगमन एवं अवलोकन गर्दै सुरक्षा व्यवस्था कडा पारिएको उनले बताए । गस्तीसँगै निर्वाचन लक्षित मजवुत सुरक्षा व्यवस्था, चोरी तस्करी तथा अपराधजन्य गतिविधि नियन्त्रण एवं रोकथामलाई प्राथमिकतामा राखिएको छ । प्रदेश १ मा झापा, मोरङ र सुनसरी गरेर भारतसँग २ सय ६९ दशमलव १२ किलोमिटर खुला सीमा छ ।
