विदेश गएकी गीता हराइन्, खोज्दै परिवार

हराएकी छोरीको तस्बिर देखाउँदै आमा दुर्गादेवी ।

सतिसकुमार राजवंशी

विराटनगर । सुनसरीको इटहरी उपमहानगरपालिका वडा २ का महेन्द्र गिरीकी श्रीमती ३६ वर्षीया गीता गिरी सम्पर्कमा नआएपछि परिवारले खोजी गरिरहेको छ । परिवारको अनुरोधमा प्रहरीले पनि खोजी गर्दा उन कहाँ छिन् भन्ने पत्ता लाग्न सकेको छैन ।

गीतालाई उनका श्रीमान महेन्द्र, छोरा माधव, आमा दुर्गादेवी पुरी, बुबा मोहन पुरीलगायत परिवारका अन्य सदस्यले निरन्तर खोजी गरिरहेका छन् । १५ वर्षे छोरा माधवले आमाको सम्झना धेरै आउने भन्दै जहाँ जुन अवस्थामा भएपनि एकपल्ट भेट्न आउन अनुरोध गरेका छन् ।

गीता २०७१ भदौ ११ गते वैदेशिक रोजगारका लागि कतार गएकी थिइन् । विदेशमा रहँदा परिवारको सम्पर्कमा थिइन् । घर फर्कन एक वर्ष वाँकी रहँदा सम्पर्कविहीन भएको श्रीमान् महेन्द्रले बताए ।

गीता गिरी ।

बेपत्ता भएको करिब आठ वर्षपछि महेन्द्रले इलाका प्रहरी कार्यलय इटहरीमा हुलियासहि खोजी गरिदिन निवेदन दिएका थिए । त्यसपछि खोजी सुरु गरेको तर हालसम्म फेला नपरेको प्रहरी निरीक्षक बिष्णुबहादुर खड्काले जानकारी गराए ।

गृह मन्त्रालयअन्तर्गत अध्यागमन विभागले ०७४ असोजको २७ गते गीता नेपाल आइसकेको अभिलेखमा देखिएको जनाएको थियो । विभागको यो जानकारीपछि परिवार उनी नेपाल फर्केकोमा अब भेट हुन आशामा थिए । तर निरन्तर खोजी गर्दा पनि अत्तोपत्तो नभएपछि चिन्तामा डुबेका छन् ।

(प्रशिक्षार्थी)