तस्बिरः राजेश गौतम/एएमजी टाइम्स
विराटनगर । मनसुनी गतिविधि अझै सक्रिय रहँदा प्रदेश १ सहित मुलुकका विभिन्न स्थानमा वर्षा भइरहेको छ । विराटनगरमा बुधबार बिहानदेखि ठूलो वर्षा भइरहेको छ । प्रदेश १ का अरु स्थानमा पनि उस्तै अवस्था देखिएको छ ।
जल तथा मौसम पूर्वानुमान महाशाखाका अनुसार नेपालबाट मनसुन बाहिरने अन्तिम बेला भएकाले वर्षा भइरहेको हो । मौसमविद वरुण पौडेलका अनुसार खासै ठूलो मौसमी गतिविधि सक्रिय नभए पनि मनसुनी गतिविधि उत्तरार्धमा देखिएको छ ।
क्रमिक रूपमा मौसम सुधार हुँदै गएको र यो क्रम जारी रहने महाशाखाले जनाएको छ।
शनिबारदेखि देशभरको मौसम सफा हुने देखिएको पौडेलले जनाएका छन् । त्यसअघि विशेषगरी पहाडी क्षेत्रमा केही बदली र हल्का पानी पर्ने सम्भावना छ।
पूर्वबाट भित्रिएको मनसुन पश्चिमबाट बाहिरिने गर्छ। यो वर्ष गएको जुन ५ मा मनसुन भित्रिएको थियो। मनसुन बाहिरिने सरदर मिति अक्टोबर २ भए पनि अहिलेसम्म मनसुनी गतिविधि सक्रिय हुँदा विभिन्न स्थानमा भारी वर्षा भएको थियो।
एक दुई दिनभित्रै मुलुकका सबै क्षेत्रको मौसम सुधारोन्मुख देखिएको महाशाखाले जनाएको छ।
