विराटनगर । प्रदेश १ का वन, वातावरण तथा भू–संरक्षण मन्त्री शेखरचन्द्र थापालाई डेंगुको संक्रमण पुष्टि भएको छ ।
उनलाई सोमबारबाट डेंगुको लक्षण देखिएको थियो । विराटनगरको नोबेल शिक्षण अस्पतालमा परीक्षण गराउँदा रिपोर्ट पोजिटिभ आएको हो । थापालाई उपचारका लागि मंगलबार बिहान नोबेलमै भर्ना गरिएको उनको सचिवालयले जनाएको छ ।
नेपाली कांग्रेसका नेतासमेत रहेका मन्त्री थापाले पनि सामाजिक सञ्जालमार्फत आफूलाई डेंगु संक्रमण भएको सार्वजनिक गरेका छन् । चिकित्सकको सल्लाह बमोजिम उपचारमा रहेको जानकारी उनले गराए ।
चिकित्सकको निगरानीमा २ दिनसम्म उनको उपचार गरिने जनाइएको छ । हाल थापालाई ज्वरो घट्ने र बढ्ने समस्या रहेको अस्पतालले जनाएको छ । यद्यपि दिउँसोबाट स्वास्थ्य अवस्थामा सुधार हुँदै गएको सचिवालयले जाानकारी दिएको छ ।
थापाले आगामी निर्वाचनका लागि सत्तारुढ गठबन्धनबाट प्रदेशसभा सदस्य पदमा मोरङको क्षेत्र नम्बर ३ ‘क’बाट उम्मेदवारी दिएका छन् । उम्मेदवारी मनोनयन दर्ता पश्चात जनताको घरआँगनमा उपस्थित हुनुपर्नेमा स्वास्थ्य समस्याका कारण केही दिनको उपचारपछि मात्रै नियमित भेटमा आउने उनले सामाजिक सञ्जालमा उल्लेख गरेका छन् ।
विगत ३५ वर्षदेखिको निरन्तर राजनीतिक यात्रामा सहभागी हुँदै आएको उल्लेख गर्दै उनले अहिलेको अवस्था र बाध्यतालाई बुझिदिन सबैमा अपिल गरेका छन् । थापा समानुपातिकतर्फका प्रदेशसभा सदस्य हुन् ।
