प्रत्यक्षतर्फ आज उम्मेदवारी दर्ता गरिंदै

विराटनगर । मंसिर ४ मा हुने प्रतिनिधि सभा तथा प्रदेश सभा निर्वाचनका लागि प्रत्यक्षतर्फ आज आइतबार उम्मेदवारीका लागि मनोनयन दर्ता हुँदैछ । निर्वाचन आयोगले योग्यता पुगेका सबै उम्मेदवारहरलाई आफ्नो मनोनयन दर्ता गर्न सहजीकरण गर्ने भएको छ ।

आयोगका अनुसार १० बजेदेखि ५ बजेसम्म उम्मेदवारी दर्ता गरिसक्नुपर्नेछ । निर्वाचनका लागि उम्मेदवारी मनोनयन दर्ताको सम्पूर्ण तयारी पूरा भएको आयोगले जनाएको छ ।

प्रमुख निर्वाचन आयुक्त दिनेशकुमार थपलियाले त्यसका लागि योग्यता पुगेका हरेक नागरिकलाई उम्मेदवार मनोनयनका लागि आवश्यक सहजीकरण गर्न निर्वाचन आयोग तयार रहेको बताएका छन् ।

उम्मेदवारी मनोनयनका लागि उम्मेदवारहरूको भौतिक उपस्थिति अनिवार्य नरहेको उनले उल्लेख गरेका छन् ।

दलको आधिकारिक पत्र, वारेसनामा र मतदाता परिचय पत्रको निस्सा भए मनोनयन गर्न सकिने व्यवस्था निर्वाचन अधिकृतको कार्यालयमा गरिएको आयोगले जनाएको छ ।

निर्वाचन आयोगले उम्मेदवारी मनोनयनका लागि २५ जना भन्दा बढी निर्वाचन अधिकृतको कार्यालयमा नजान राजनीतिक दल र उम्मेदवारहरूलाई आग्रह गरेको छ ।

प्रमुख निर्वाचन आयुक्त थपलियाले सरकारी स्रोत, साधनको प्रयोग गरेर निर्वाचनको प्रचारका लागि आफ्नो निर्वाचन क्षेत्रबाहेक अन्य ठाउँमा नजान पनि मन्त्रीहरुलाई रोक लगाइएको बताएका छन् ।

अन्य निर्वाचन क्षेत्रमा कुनै काम विशेष जान पर्‍यो भने आयोगको अनुमति अनिवार्य रूपमा लिनुपर्ने व्यवस्था निर्वाचन आचारसंहितामा उल्लेख गरिएको उनको भनाई छ ।

मनोनयन दर्ता गर्नु अघिल्लो दिन अधिकांश राजनीतिक दलहरुले आफ्नातर्फबाट निर्वाचनमा प्रतिस्पर्धा गर्ने उम्मेदवारहरुको नामावलीलाई अन्तिम रुप दिएका छन् ।

सत्तारुढ गठबन्धन दलहरुले विभिन्न निर्वाचन क्षेत्रमा एकअर्कालाई सहयोग गर्ने गरी उम्मेदवार चयन गरेका छन् । प्रतिपक्षी नेकपा (एमाले) ले पनि अरु केही दलसँग स्थानअनुसार सहयोग गर्ने र लिने रणनीति बनाएको छ ।

उम्मेदवार चयन गर्दा कतिपय दलका पुराना नेता बाहिरिएका छन् भने कतिपय दलमा नयाँ अनुहार देखिएका छन् । उम्मेदवार चयनमा भेदभाव भएको भन्दै असन्तुष्टि पनि चुलिएको छ ।