एमाले र राप्रपाबीच चुनावी तालमेलमा ‘सहमति’

विराटनगर । आगामी मंसिरमा हुने प्रतिनिधि सभा तथा प्रदेश सभा निर्वाचनका लागि नेकपा एमाले र राप्रपाबीच चुनावी तालमेल हुने लगभग पक्कापक्की भएको छ । काठमाडौंमा शुक्रबार ती पार्टीका शीर्ष नेताबीच छलफल गरिएको छ । छलफलमा तालमेलबारे सहमति भएको जनाइएको छ ।

एमाले अध्यक्ष केपी शर्मा ओलीको निवासमा भएको छलफलमा दुवै पार्टीले प्रतिनिधिसभा र प्रदेशसभा निर्वाचनका लागि तालमेल कसरी गर्ने भन्ने खाका तयार पारेका छन् ।

एमालेसँग तालमेलबारे ८० प्रतिशत सहमति भइसकेको राप्रपा नेता बुद्धिमान तामाङले बताएका छन् । २० प्रतिशतमा शनिबार सहमति जुट्ने उनले बताए ।

केही सिटमा थप छलफल गर्नुपर्ने भएकाले शुक्रबार अन्तिम टुंगो लाग्न नसकेको नेताहरुले बताएका छन् ।

राप्रपाले निश्चित निर्वाचन क्षेत्रमा मात्र एमालेसँग तालमेल गर्न लागेको जनाइएको छ । अरु क्षेत्रमा ‘मित्रवत प्रतिस्पर्धा’ हुने राप्रपा नेता तामाङले बताए ।