काठमाडौं । प्युठानमा पहिरोले घर बगाउँदा ६ जना बेपत्ता भएका छन् । प्युठानको माण्डवी गाउँपालिका ४ फरन्डीमा शुक्रबार मध्याह्न झरेको पहिरोले बमबहादुर बुढा मगरको घर बगाउँदा ६ जना बेपत्ता भएको प्रहरीले जनाएको छ ।
पहिरोमा बमबहादुरसहित उनकी श्रीमती, बुहारी र तीनजना बालबालिका बेपत्ता भएको प्रहरीले जनाएको छ ।
पहिरो गएको ठाउँनजिकै रहेका तीन घर परिवारलाई अन्यत्र सारिएको छ ।
सडक बन्द भएका कारण पहिरो गएका ठाउँमा झन्डै तीन घण्टासम्म पनि उद्धार टोली घटनास्थल पुग्न नसकेको प्युठानका प्रमुख जिल्ला अधिकारी सुनिता नेपालले जानकारी दिएका छन् ।
सडक बन्द भएका कारण उद्धारका लागि तयारी अवस्थामा रहेको नेपाल आर्मी, सशस्त्र प्रहरी र जनपथ प्रहरीको टोली बीच बाटोमै रोकिएको नेपालले बताए ।
