विराटनगर । दसैँ टीकाको दोस्रो दिन बिहीबार पनि मान्यजनबाट टीका, जमरा र आशिर्बाद लिने क्रम जारी छ । विजयादशमीको मुख्य दिन बुधबार टीका लगाउन छुटेकाहरूले आफ्ना मान्यजन र आफन्तहरूबाट टीका थापेर आशीर्वाद लिने चलन छ ।
दसैँमा टाढा–टाढाका आफन्तजनहरू पनि समयमै सबै आफन्तहरूकहाँ पुग्ने प्रयास गर्दछन् । आजदेखि टाढाका आफन्तसँग टीका थाप्न जाने गरिन्छ ।
घटस्थापनाका दिन दसैँ घरमा विधिपूर्वक स्थापना गरी दुर्गा भवानीको पूजा–आराधना गरिएको टीका, जमरा र प्रसाद पूर्णिमासम्म नै आफूभन्दा ठूलाहरूको हातबाट थापेर आशीर्वाद लिने गरिन्छ ।
आफूभन्दा अग्रज मान्यजनहरूको हातबाट टीका ग्रहण गर्दा सुख, शान्ति, समृद्धि र वैभव प्राप्त हुने विश्वास रही आएको छ । ठूलाले सानालाई टीका लगाइ आशिर्वाद दिने दशैँलाई, आपसी सद्भाव मित्रता र पारस्परिक विश्वासको रूपमा लिने गरिन्छ ।
यसपटक दसैँका बेला निरन्तर वर्षा भइरहेकाले टाढा टाढा जान भने समस्या भइरहेको छ । कतै सामान्य अनि कतै ठूलो वर्षा भइरहेकाले आउजाउ गर्न असहज अवस्था भएको छ । यस्तो अवस्थामा पनि दसैँको उल्लास भने कायम छ ।
मौसमविदहरुले अझै केही दिन वर्षा हुने सम्भावना रहेकाले कतै यात्रा गर्दा सावधानी अपनाउन आग्रह गरेका छन् ।
