पर्वका बेला पनि काठमाडौंमा फुटपाथ खाली गर्ने अभियान नरोकिने

काठमाडाैं । काठमाडौं महानगरपालिकाले महानगर क्षेत्रभित्रका सडक किनारा व्यवस्थापनका कार्यक्रम चाडबाडको बेला पनि निरन्तर सञ्चालन गर्ने भएको छ।

चाडबाडको समयमा फुटपाथ व्यापारका लागि लचिलो हुनुपर्ने माग उठिरहेको बेला महानगरले फुटपाथमा पहिलो प्राथमिकता पैदलयात्रीले पाउने भन्दै त्यसको सहजताका लागि अभियान नरोक्ने बताएकाे छ ।

महानगरले विज्ञप्ति जारी गर्दै फुटपाथ खाली गर्ने अभियान महानगरले नरोक्ने र यस विषयमा चाडपर्वको कारण देखाएर लचिलो पनि नहुने स्पष्ट पारेकाे छ ।

‘पैदल यात्रीका लागि पर्वका समयमा फुटपाथ अझ बढी आवश्यक पर्छ’ विज्ञप्तिमा भनिएको छ, ‘अन्य समयभन्दा योबेला जेष्ठ नागरिक, बालबालिका, अपाङ्गता भएका व्यक्ति, गर्भवती महिलाहरु किनमेलका घर वाहिर निस्कने समय हो । उहाँहरुको पैदल यात्रा सुरक्षा महानगरपालिकाको जिम्मेवारी हो ।’

पैदल यात्रीले सडक किनारामा निर्वाध हिँड्न पाउने अधिकार स्थापित गराउन काठमाडौं महानगरले आफ्ना क्रियाकलाप आंशिक रुपमा होइन पूर्ण र दीर्घकालीन रुपमा सञ्चालन गर्ने महानगरद्वारा जारी विज्ञप्तिमा भनिएको छ ।

सहरी सुशासन र सहरी विकास व्यवस्थापनका कार्यक्रम पर्व विशेष वा अन्य कारण विशेष स्थगित हुने वा लचिलो नहुने कुरामा समेत महानगरले सबैलाई स्पष्ट हुन आग्रह गरेको छ ।

हेर्नुहाेस् विज्ञप्ति