काठमाडौं। सल्यानको कपुरकोटमा मंगलबार राति जीप दुर्घटना हुँदा ८ जनाको मृत्यु भएको छ। बिहे भोजमा सहभागी हुनेहरुलाई लिएर फर्कँदै गरेको रा१ज ५६३ नम्बरको जीप दुर्घटना भएको प्रहरीले जनाएको छ।
कपुरकोट गाउँपालिका–३ मूलपानीमा दुर्घटना भएको हो। घटनामा एकजना घाइते भएका छन्।
जिल्ला प्रहरी कार्यालय सल्यानका अनुसार सल्यान कपुरकोट गाउँपालिका ६ जलबाँङका २१ वर्षीय चालक जितबहादुर बोहोरा, ३७ वर्षीया धर्मा ओली, ४० वर्षिय टोपबहादुर ओली, ११ वर्षीय बसन्त ओली, ३० वर्षिय सुरेश खत्री, ७० वर्षिय खुमलाल ओली, ५५ वर्षीया कुमारी ओली, ३५ वर्षीय ललित ओलीको घटनास्थलमै मृत्यु भएको हो।
दुर्घटनाबारे जानकारी पाएलगत्तै टोली घटनास्थलमा पुगेर अवस्था बुझिरहेको उल्लेख गर्दै जिल्ला प्रहरीले घाइतेको स्थानीय अस्पतालमा उपचार भइरहेको जानकारी दिएको छ।
