विराटनगर । सुनसरीको देवानगन्ज गाउँपालिका–१ मा सोमबार राति मोटरसाइकल दुर्घटना हुँदा एक जनाको मृत्यु भएको छ।
देवानगन्ज–१ का २७ वर्षीय अनन्दी दासले चलाएको मोटरसाइकलको पछाडि सवार ३५ वर्षीय रामचन्द्र दासको दुर्घटनामा परेर मृत्यु भएको प्रहरीले जनाएको छ। पूर्वबाट पश्चिमतर्फ जाँदै गरेको तत्काल नम्बर नखुलेको मोटरसाइकल आफैँ अनियन्त्रित भएर राति ११ बजेतिर दुर्घटनामा परेको थियो।
प्रहरीका अनुसार गम्भीर घाइते भएका दासको विराटनगरको गोल्डेन अस्पतालमा उपचार क्रममा मृत्यु भएको हो। मोटरसाइकल चालकलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ।
