विराटनगर । झापाका विभिन्न स्थानमा आइतबार ठूलो वर्षा हुने भन्दै सावधानी अपनाउन सूचित गरिएको छ । झापाका केचना, चन्द्रगढी, विर्तामोड, शनिश्चरे, कन्काई तथा इलामका दक्षिणी क्षेत्रहरुमा ठूलो वर्षा हुने अनुमान गरिएको छ ।
कतिपय क्षेत्रमा बिहानैदेखि वर्षा भइरहेको छ । दिउँसो ती क्षेत्रमा ठूलो वर्षाको अनुमान गरिएको छ ।
मेची, बिरिङ, निन्दा, बक्राह, मावा रतुवा, अदुवाखोलालगायत झापाका साना खोलामा आकस्मिक बाढी आउन सक्ने सम्भावना रहेको बाढी पूर्वानुमान महाशाखाले जनाएको छ ।
दिउँसो १२ बजेसम्म सतर्कता अपनाउन महाशाखाले आग्रह गरेको छ । विराटनगरलगायत मोरङका विभिन्न क्षेत्रमा शनिबार राति ठूलो वर्षा भएको थियो ।
झापाको विर्तामोड र आसपास क्षेत्रमा पनि शनिबार वर्षा भएको थियो । वर्षाका कारण विभिन्न स्थान जलमग्न बनेका थिए ।
