विराटनगर । झापाको मेचीनगर नगरपालिका–१२ पिपल डाँगीमा शुक्रबार राति मोटरसाइकल दुर्घटना हुँदा दुई जनाको मृत्यु भएको छ ।
मेची लोकमार्गमा उत्तरबाट दक्षिणतर्फ आउँदै गरेको प्रदेश १–०१–०१४ प ३३५० र विपरीत दिशातर्फ जाँदै गरेको प्रदेश १–०१–०१४ प २६७८ नम्बरको मोटरसाइकल एकआपसमा ठक्कर खाँदा राति ११ः२५ बजेतिर दुर्घटना भएको हो । प्रदेश १ ट्राफिक प्रहरी कार्यालय इटहरीका अनुसार दुर्घटनामा दुवै मोटरसाइकलका चालकको मृत्यु भएको छ ।
३३५० नम्बरको मोटरसाइकल चालक कन्काई नगरपालिका–४ का ३८ वर्षीय कृष्णप्रसाद सिग्देल र अर्को मोटरसाइकलका चालक अर्जुनधारा नगरपालिका–४ का ४५ वर्षीय विष्णु थापाको मृत्यु भएको प्रहरीले जनाएको छ । दुर्घटनामा परेर गम्भीर घाइते भएका उनीहरुको बिर्तामोडस्थित बी एन्ड सी अस्पतालमा उपचारका क्रममा आज (शनिबार) बिहानका राति १ः३५ बजेतिर मृत्यु भएको हो ।
दुर्घटनामा ३३५० नम्बरको मोटरसाइकलको पछाडि सवार कन्काई–४ का ५३ वर्षीय रामबहादुर अधिकारी घाइते भएका छन् । अधिकारीको बी एन्ड सीमै उपचार भइरहेको छ । दुवै मोटरसाइकललाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ ।
