सवारी साधनको आयात फुकुवा गर्ने तयारीमा सरकार

काठमाडौं । सरकारले सवारी साधनको आयात फुकुवा गर्ने तयारी गरेको छ । अर्थमन्त्री जर्नादन शर्माले मुलुकको विद्यमान अर्थतन्त्रको अवस्थाबारे सरकारले नजिकबाट नियालिरहेको भन्दै त्यसमा सुधार आउनसाथ आयात फुकुवा गरिने बताएका हुन् ।

सरकारले विदेशी मुद्रा सञ्चितिको अभाव देखाउँदै निजी प्रयोजनका कार, जीप, भ्यान र १५० सीसीभन्दा माथिका मोटरसाइकल आयातमा प्रतिबन्ध लगाएको छ ।

प्रतिबन्ध लगाइएका धेरै वस्तुको आयात खुलिसकेको उल्लेख गर्दै अर्थमन्त्री शर्माले काठमाडौंमा आयोजित नाडा इभी एक्स्पो उद्घाटनका क्रममा यस्तो जानकारी दिएका हुन् ।

विदेशी मुद्रा सञ्चितिमा कमी आएपछि राष्ट्र बैंकले प्रतीतपत्र (एलसी) खोल्दा नगद ‘मार्जिन’ राख्नुपर्ने व्यवस्था गरेको थियो । यस्तो व्यवस्थाले पनि सवारीसाधनको आयातमा कमी आएको मन्त्री शर्माको भनाइ छ ।

सरकारले निश्चित अवधिपछि विद्युतीय सवारी मात्र चल्ने व्यवस्था गर्न लागेको पनि अर्थमन्त्री शर्माले बताए । पेट्रोलियम पदार्थबाट चल्ने सवारी कहिले रोक्ने भन्ने विषयमा अध्ययन भइरहेको उनको भनाइ छ । चारपांग्रे सवारी साधन उत्पादन र एसेम्बल गर्ने उद्योग स्थापना गरे तिनका पार्टपुर्जा र कच्चा पदार्थ आयातमा ५० प्रतिशत छुट विषय कुरा बजेटमा राखिसकिएको उनले जनाए ।

अर्थ मन्त्रालयले सवारीसाधन आयात रोकेर राजस्वमा ठूलो असर परेको नेपाल उद्योग वाणिज्य महासंघका अध्यक्ष शेखर गोल्छाले बताए ।

आयात रोक्न नयाँ–नयाँ नियम लिएर आउँदा निजी क्षेत्र त्रसित भएको उल्लेख गर्दै उनले मन्त्रालयले अर्थतन्त्रलाई चलायनमान बनाउने कदम चाल्नुपर्नेमा जोड दिए ।

नाडा अटोबाइल्स एसोसिएसन अफ नेपालका ध्रुव थापाले नेपालमा आयात हुने सवारी साधनमा कार, जीप, भ्यान र १५० सीसीभन्दा माथिका मोटरसाइकल आयातमा गत वैशाख १३ मा लगाइएको प्रतिबन्ध फुकाउन आग्रह गरे ।