मोरङका बैंक तथा वित्तीय संस्थामा २४ घण्टै निगरानी

विराटनगर । दसैँ, तिहार, छठजस्ता चाडपर्वको पूर्वसन्ध्यामा सुरक्षा व्यवस्था मजबुत बनाउन प्रहरीले विशेष योजना लागू गरेको छ । प्रदेश १ को राजधानी विराटनगरसहित मोरङमा विशेष सुरक्षा योजना लागू गरिएको हो ।

सर्वसाधारणमा सुरक्षाको प्रत्याभूति दिलाएर चाडपर्वलाई सुरक्षित, मर्यादित र सभ्य बनाउन योजना बनाएर लागू गरिएको मोरङ प्रहरीले बिहीबार पत्रकार सम्मेलन गरी जानकारी दिएको हो ।

मोरङ प्रहरी प्रमुख एसपी शान्तिराज कोइरालाले सुरक्षित तवरले चाडपर्व मनाउने वातावरण सृजना गर्ने दायित्व प्रहरीको भएको बताए । नागरिकको स्वतन्त्रता, धार्मिक तथा सांस्कृतिक आस्था, जनधन तथा यात्रुको सुरक्षा र उपभोक्ताको अधिकारलाई मध्यनजर गरेर चाडपर्व लक्षित सुरक्षा योजना तयार पारिएको उनको भनाइ छ ।

मादक पदार्थ सेवन (मापसे) गरेर हुन सक्ने उसृङ्खल गतिविधि, लोकमार्ग तथा सहायक मार्गहरुमा अवाञ्छित क्रियाकलापलगायत आपराधिक गतिविधि नियन्त्रण प्रहरीको प्राथमिकतामा परेको छ ।

अति विशिष्ट, विशिष्ट व्यक्ति तथा उनीहरुको निवास, सरकारी कार्यालय, महत्वपूर्ण प्रतिष्ठान, बैंक एवं वित्तीय संस्था, बजार, पसल लगायत सार्वजनिकस्थलमा भरपर्दो र विश्वसनीय सुरक्षा व्यवस्था मिलाइएको कोइरालाले बताए ।

उनका अनुसार भारतसँगको खुला सीमाको फाइदा उठाउँदै हुनसक्ने चोरी, तस्करी लगायत विभिन्न अपराधिक गतिविधिका साथै नजिकिँदो प्रतिनिधि तथा प्रदेशसभा निर्वाचनलाई लक्षित गरेर सुरक्षा सतर्कता बढाइएको छ ।

निर्वाचन लक्षित घरदैलो, भेटघाट, छलफलसमेतका राजनीतिक कार्यक्रमलाई मध्यनजर गरेर सुरक्षाका लागि प्रहरी परिचालन गरिएको जानकारी उनले दिए ।

कोइरालाका अनुसार बैंक, वित्तीय संस्था एवं आर्थिक गतिविधि हुने ठाउँ र महत्वपूर्ण प्रतिष्ठानहरुमा प्रहरीले २४ घण्टानै निगरानी बढाउन थालेको छ । सुनचाँदी पसल, सरकारी तथा गैर सरकारी कार्यालय, एटीएम बुथ, सार्वजनिकस्थल र पसलहरुमा प्रहरी तैनाथ गरिएको छ ।

चोरी, डकैती, लुटपाट र गुण्डागर्दी चन्दा असुली, ठगी हुनसक्ने सम्भावनालाई मध्यनजर गरेर सुरक्षा व्यवस्था मजवुत बनाइएको प्रहरीले जनाएको छ ।

मोरङमा चाडपर्वलाई मर्यादित, व्यवस्थित र सुरक्षित बनाउन १ हजार २ सय ९१ जना प्रहरी परिचालन गरिएको छ । सुरक्षा व्यवस्था मजवुत बनाउन थप प्रहरी जनशक्ति माथिल्लो कार्यालयबाट माग गरिएको छ । एसपी कोइरालाले सम्भावित र विगतमा भएका घटना एवं अपराधिक गतिविधिलाई मध्यनजर गर्दै सुरक्षा योजना तयार पारिएको जानकारी दिए ।

उनका अनुसार सुरक्षा योजनालाई प्रभावकारी कार्यान्वयका लागि सादा पोसाक र हतियारसहितका प्रहरी परिचालन गरिएको छ । प्रहरीको पिकेट, सवारी गस्ती, मोबाइल, मोटरसाइकल, साइकल र पैदल गस्ती बढाएर सुरक्षा व्यवस्था मिलाइएको उनले बताए ।

कोइरालाका अनुसार धार्मिक तीर्थस्थल, शक्तिपीठ, मठ मन्दिर लगायत भक्तजनहरुको भीडभाड एवं घुइँचो हुने स्थानको सुरक्षामा विशेष ध्यान दिइएको छ । भीडभाडमा हुने चोरी, डकैती र लुटपाटका घटना, मादक पदार्थ सेवन (मापसे)बाट हुने झैझगडा एवं अपराध नियन्त्रण, कालो बजारी, इन्धन तथा दैनिक उपभोग्य वस्तुको कृतिम अभाव नियन्त्रण लगायतमा पनि प्रहरीको ध्यान जान थालेको छ ।

चाडपर्वमा यातायातको सहज उपलब्धता, ट्राफिक व्यवस्थापन, तस्करी, हातहतियार तथा लागूऔषध र मदिराको अवैध ओसारपसार नियन्त्रणलाई प्रहरीले प्राथमिकतामा राखेको छ । त्यस्तै जुवा, तास लगायत गैरकानुनी खेलहरु र शान्ति भड्काउने समूहलाई पूर्ण रुपमा नियन्त्रणमा लिइने उनले बताए । उनका अनुसार उद्योग, कलकारखाना, महत्वपूर्ण प्रतिष्ठान, लोकमार्ग र अन्य सहायक राजमार्गको सुरक्षा अवस्थामा कुनै कमजोरी हुन नदिने तथा होटल, लज एवं रेष्टुरेन्टको नियमित चेकजाँचको व्यवस्था मिलाइएको छ ।

शंकास्पद व्यक्तिहरु एवं सार्वजनिक स्थलमा हुने गतिविधीको निगरानी, पटकाको ओसारपसार तथा बेचबिखन, सीमा क्षेत्रमा कडाई, पकेटमार लगायत अपराधिक प्रवृत्तिका मानिसहरुको पहिचान र नियन्त्रणमा लिन थालिएको प्रहरीले जनाएको छ । मादक पदार्थ सेवन (मापसे) गरेर सार्वजनिक स्थलहरुमा हो–हल्ला एवं झै–झगडा गर्नेलाई तत्काल नियन्त्रणमा लिएर कारबाही अघि बढाइने प्रहरीले जनाएको छ ।

सवारी साधनमाथि आकस्मिक चेकजाँच सुरु गरिएको छ । अन्य सुरक्षा निकायसँग समन्वय गरेर चाडपर्वका बेला हुनसक्ने विभिन्न घटनाबाट बच्न सबैलाई सजग गराउँदै सर्तकता अपनाउन आग्रह गरिएको एसपी कोइराला बताउँछन् । सीमा अपराध नियन्त्रणका लागि भारतीय ‘काउण्टर पार्ट्स’ सँगको समन्वय र सहकार्यलाई पनि प्रहरीले महत्व दिएको छ ।

महिला, बालबालिका, अशक्त, ज्येष्ठ नागरिकविरुद्ध हुनसक्ने अपराधको रोकथाम तथा नियन्त्रणका लागि विभिन्न उपाय अवलम्बन गरिने भएको छ । चाडपर्वमा प्रमुख जिल्ला अधिकारी काशीराज दाहालसँग समन्वय गरेर अत्यावश्यक सेवाका साधनहरु एम्बुलेन्स र दमकल तयारी अवस्थामा राखिने एसपी कोइरालाले बताए ।

कुनै पनि घटनामा परेर घाइते भएकाको उपचारका लागि कोसी लगायत सबै अस्पताललाई २४ घण्टानै तयारी अवस्थामा राख्न प्रजिअसँग समन्वय भइसकेको उनको भनाइ छ । कोइरालाका अनुसार विष्फोटक पदार्थलाई निष्कृय पार्न विशेष टोलीका लागि नेपाली सेनासँग समन्वय गरिएको छ ।