काठमाडौँ । रुकुमपूर्वको भूमे गाउँपालिका–३ क्याङ्सी बगरमा बिहीबार भएको बस दुर्घटनामा पाँच जनाको मृत्यु भएको छ ।
काठमाडौँबाट रुकुमकोट जाँदै गरेको ग१ख ९१०९ नम्बरको बस बिहीबार दिउँसो साढे २ बजे दुर्घटनामा परेको जिल्ला प्रहरी कार्यालय रुकुमपूर्वका प्रहरी नायब उपरीक्षक प्रकाश डाँगीले जानकारी दिए ।
१७ जना सवार रहेको बस क्याङ्सी बगरस्थित मध्यपहाडी राजमार्गदेखि अन्दाजी १ सय मिटर तल खसेको प्रहरीले जनाएको छ ।
सो दुर्घटनामा घटनास्थलमै पाँचको मृत्यु भएको डीएसपी डाँगीले बताए । उनका अनुसार मृतकको सनाखत हुन बाँकी छ ।
दुर्घटनामा १३ जना घाइते भएको र तीन जनाको अवस्था गम्भीर प्रहरीले जनाएको छ। उनीहरूको रुकुमपूर्व अस्पतालमा उपचार भइरहेको छ ।
उनका अनुसार घटनास्थलमा उद्धार कार्य भइरहेको छ । घाइतेलाई हेलिकप्टरबाट उपचारका लागि लैजाने पहल भएको छ ।
नेपाली सेनाको नरसिङ दल गुल्म रुकुमपूर्वका सेनानी बाबुलाल जिसीले घाइतेको उपचारका लागि सुर्खेतबाट हेलिकप्टर ल्याउने तयारी भइरहेको जानकारी दिए।
