हेटौँडा । मकवानपुरमा बिहीबार दिउँसो बस दुर्घटना हुँदा सात जनाको मृत्यु भएको छ ।
काठमाडौंबाट हेटौँडा जाँदै गरेको ना ३ ख ७८५८ नं. को मिनीबस भीमफेदी गाउँपालिका–६ स्थित जुरिखेतको घुम्तीमा दुर्घटना भएको हो ।
दुर्घटनामा ६ जनाको घटनास्थलमै र एक जनाको भीमफेदी प्राथमिक स्वास्थ्य केन्द्रमा उपचारका क्रममा मृत्यु भएको जिल्ला प्रहरी कार्यालय मकवानपुरका प्रहरी उपरीक्षक बामदेव गौतमले जानकारी दिए ।
दुर्घटनामा परी घाइते भएका १८ जनाको भीमफेदी प्राथमिक स्वास्थ्य केन्द्र र हेटौँडा अस्पतालमा उपचार भइरहेको प्रहरीले जनाएको छ ।
बस काठमाडौंबाट वीरगन्जका लागि छुटेको प्रहरीले जनाएको छ । बस दुर्घटनाग्रस्त हुँदा हेटौँडाबाट काठमाडौँ जाँदै गरेको मधेस प्रदेश–०३–००१ ज ०२७१ नम्बरको सुमोमा ठोक्किएको थियो ।
प्रहरी उपरीक्षक गौतमका अनुसार मृतक सबै पुरुष भएको र ३० देखि ४० वर्ष उमेर समूहको रहेका छन् ।
घुमाउरो बाटोमा दुर्घटना हुँदा भई बस ५० मिटर तल तल्लो सडकमा खसेको प्रहरीले जनाएको छ ।
दुर्घटनामा घाइतेहरूलाई अस्पताल पठाइएको र मृतकको सनाखत हुन बाँकी रहेको उनले जानकारी दिए।
