विराटनगर । विश्व समुदायले आज (बिहीबार) प्राथमिक उपचार दिवस मनाउँदै छ । प्रत्येक वर्ष संसारभर २२ सेप्टेम्बरमा यो दिवस मनाउने गरिन्छ ।
विभिन्न कार्यक्रम र जागरणका साथमा यो दिवस मनाउने गरिन्छ । आइएफआरसीको पहलमा सन् २००० देखि यो दिवस मनाउन थालिएको हो । कुनै घटना, दुर्घटना र युद्धका घाइतेको प्राणरक्षार्थ प्राथमिक उपचारको ठूलो महत्व छ ।
जीवन रक्षाका आधाभूत सीपहरु आर्जन गर्दै शरीरमा लागेका घाउ र चोटबाट रक्तश्राव रोक्ने ज्ञान प्राप्त गर्ने तथा बिरामीको प्राथमिक उपचार गराउने विषयलाई यो दिवसले प्राथमिकतामा राखेको हुन्छ । दिवसका माध्यमबाट सवारी दुर्घटना, आगलागी, विषादी सेवन, जीवजन्तुको आक्रमण, सर्पदंश लगायत विभिन्न घटनामा परेका घाइतेको जीवन जोगाउन प्राथमिक उपचारमा जोड दिने गरिन्छ ।
सामान्यतया प्राथमिक उपचारमा मल्हम, पट्टी, ह्यान्डीप्लास्ट, आधारभूत ओखतीहरु, जीवनजल, सामान्य कैंची, ब्लेड, थर्मामिटर अनि एन्टीसेप्टीक धुलोहरु प्रयोग हुन्छ । आकस्मिक बिरामी परिएमा वा दुर्घटना भएमा प्राणरक्षार्थ प्राथमिक उपचार गर्नु पर्दछ ।
नेपालमा भने प्राथमिक उपचार विधिलाई खासै वास्ता गरेको पाइँदैन । संरचनागत समस्याले नेपाली गाँउहरु अझै पनि प्राथमिक स्वास्थोपचारको मूलधारमा छैनन् । मानिसको ज्यान जोगाउन तत्काल अपनाइने उपचार विधिका लागि सहज तालिम पनि प्रदान गरेको पाइँदैन ।
