विराटनगर । सवारी चालक अनुमति पत्र (लाइसेन्स) नभएका व्यक्तिले चलाएको मोटरसाइकलको ठक्करबाट मोरङमा सोमबार वृद्धाको मृत्यु भएको छ ।
ठक्करले धनपालथान गाउँपालिका–७ की ६५ वर्षीया कलावती मण्डलको मृत्यु भएको प्रहरीले जनाएको छ । मोरङ ट्राफिक प्रमुख प्रहरी निरीक्षक राजकुमार कार्कीका अनुसार प्रदेश १–०४–००१ प ८८९४ नम्बरको मोटरसाइकलले साँझ ६ः३० बजेतिर मण्डललाई ठक्कर दिएको थियो ।
ठक्करबाट सिकिस्त घाइते भएकी उनलाई उपचारका लागि विराटनगरको गोल्डेन अस्पताल पुर्याइएको थियो। राति ८ः१० बजेतिर चिकित्सकले उनलाई मृत घोषित गरेका हुन् ।
दुर्घटनापछि फरार मोटरसाइकल चालक धनपालथान–७ का १७ वर्षीय विकास यादवलाई प्रहरीले नियन्त्रणमा लिएको छ । यादवको साथमा सवारी चालक अनुमति पत्र नभएको प्रहरीको प्रारम्भिक अनुसन्धानबाट पत्ता लागेको छ ।
लाइसेन्स प्राप्त नगरेका चालकले तीव्र गतिमा मोटरसाइकल चलाउँदा दुर्घटना भएको निरीक्षक कार्कीले बताए ।
