प्रजातन्त्र सेनानी तोरेन्द्रमान सिंह प्रधानको निधन

विराटनगर । प्रजातन्त्र सेनानी तथा समाजसेवी तोरेन्द्रमान सिंह प्रधानको सोमबार ९३ वर्षको उमेरमा निधन भएको छ। विराटनगर महानगरपालिका १० निवासी प्रधानको उपचारका क्रममा न्युरो अस्पतालमा दिउँसो ३ः४५ बजे निधन भएको हो ।

आफन्त सुवासकुमार अमात्यका अनुसार उनी मुटु र श्वासप्रश्वासका बिरामी थिए । स्वास्थ्यमा समस्या देखिएपछि उनलाई आइतबार अस्पताल भर्ना गरिएको थियो ।

आइतबारै उनले आफ्ना बुवाको श्राद्ध कर्म गरेका थिए । त्यसपछि स्वास्थ्यमा समस्या देखिएको अमात्यले बताए ।

२००७ सालको क्रान्तिमा प्रजातन्त्र प्राप्तिका लागि उनको महत्वपूर्ण योगदान थियो । उनी नेवारी संस्कृति र भूगोलका ज्ञाता समेत थिए ।

वृद्धावस्थामा पनि उनी सामाजिक कार्यमा सक्रिय रहन्थे । गणेशमान फाउन्डेसन प्रदेश १ का पूर्वअध्यक्ष रहेका उनले झिँ पुचः, नेपाल क्षयरोग निवारणलगायत विभिन्न संस्थाको नेतृत्व सम्हालेका थिए ।