रानी–बरगाछी खण्डमा २३ सय बिरुवा रोपियो

विराटनगर । कोसी राजमार्गको रानीदेखि विराटनगरको बरगाछीसम्म सोमबार वृक्षरोपण गरिएको छ । संविधान दिवसको अवसर पारेर प्रदेश १ सरकारले सडकको बीच भागमा बनाइएको अग्लो डिलमा वृक्षरोपण कार्यक्रम गरेको थियो ।

नेपाल प्रहरी, सशस्त्र प्रहरी, नेपाली सेना, स्काउट विद्यार्थी, स्वयंसेवी विद्यार्थी, निजामती कर्मचारीहरुको सहभागिता रहेको कार्यक्रममा २३ सय बिरुवा रोपिएको जनाइएको छ ।

आन्तरिक मामिला तथा कानून मन्त्रालयको आयोजना भएको कार्यक्रममा मुख्यमन्त्री राजेन्द्रकुमार राई तथा आन्तरिक मामिला तथा कानूनमन्त्री केदार कार्कीले बिरुवा रोप्ने कामको सुरुवात गरेका थिए ।

असोज २, ३ र ४ गते तीन दिनसम्म सरकारी कार्यालय तथा सार्वजनिक निकायहरूमा वृक्षारोपण तथा दीपावलीलगायत क्रियाकलाप गर्ने सरकारको घोषित कार्यक्रम थियो ।

वृक्षारोपाण सुरु गर्ने कार्यक्रममा बोल्दै मुख्यमन्त्री राईले संविधान निर्माणको छोटो अवधिमै महत्त्वपूर्ण उपलब्धि हासिल गरेको बताउँदै संविधानलाई जोगाएर लान जरुरी रहेको बताए ।

आन्तरिक मामिला तथा कानूनमन्त्री केदार कार्कीले संघीयताले विकासका गतिविधि चलायमान बनाएको दाबी गरे ।

यसैबीच, प्रदेश सरकारले दिवसको मुख्य दिन सोमबार साँझ प्रदेशवासी नागरिकलाई आ–आफ्नो घर टोल र महत्त्वपूर्ण सार्वजनिक स्थलहरूको सरसफाइका साथै घरघरमा दीपावली गर्न अपिल गरेको छ ।