गहना चोरीको आरोपमा तीनजना पक्राउ

विराटनगर । सुनचाँदीका गहना चोरी गर्न सक्रिय समूहका तीनजनालाई प्रहरीले सुनसरीको इटहरीमा पक्राउ गरेको छ । झापाको दमकका अरुण मगर, बृखमान राई र भुपेन्द्र बिकलाई पक्राउ गरिएको प्रहरीले जनाएको छ ।

जेठ पहिलो साता उनीहरुले इटहरी उपमहानगरपालिका ८ स्थित प्रविशा कार्कीको घरबाट सुनको गहना चोरी गरेको प्रहरीको आरोप छ ।

मगरले गहना चोरी गरेर राईलाई बिक्री गरेको पाइएको प्रहरीले जनाएको छ ।

इलाका प्रहरी इटहरीका निरीक्षक भीमबहादुर खड्काका अनुसार राईले उक्त गहना बिकलाई बेचेको बयानमा बताएका थिए ।

तिनैजनालाई नियन्त्रणमा लिएर घटनाबारे अनुसन्धान भइरहेको प्रहरीले जनाएको छ ।

दसैँ, तिहार जस्ता मुख्य पर्व नजिकिइरहेका बेला सहर, बजारमा चोरीका घटना बढ्न थालेपछि प्रहरीले निगरानी बढाएको छ ।